Нетаняху Трампдан Эронга зарба беришни талаб қилди — Ахиос
Исроил бош вазири ва АҚШ президенти телефон орқали мулоқот қилди. Трамп Эрон билан музокара олиб бориш тарафдори, Нетаняху эса бунга қарши.
Нетаняху Трампдан Эронга зарба беришни сўради — Ахиос
Исроил бош вазири Бинямин Нетаняху АҚШ президенти Доналд Трамп билан телефон орқали гаплашиб, ундан Эронга қарши зарбаларни қайта бошлашни талаб қилди.
Маълумотларга кўра, сиёсатчилар 31-октябр куни мулоқот қилган. Исроил томони суҳбатни “кескин”, АҚШ томони эса “очиқ” деб баҳолаган. Нетаняху Трампдан Конгрессга оралиқ сайловлардан кейин Эронга зарба беришни бошлашни сўраган. Бироқ АҚШ президенти ҳозирча ҳарбий ҳаракатлар ўрнига Қатар воситачилигида Теҳрон билан олиб борилаётган музокараларга имкон бериш тарафдори. Нетаняху эса бу музокаралардан хавотирда.
Трамп Эронга қарши аввалги операциялардан олдин (2025-йил июн ва 2026-йил феврал ойларида) ҳам икки йўналишли стратегияга амал қилган. Хусусан, у келишувга эришишга уриниб кўрган ва шу билан бирга жанговар ҳаракатларни бошлашга тайёргарлик ҳам кўрган. 2026-йил июн ойида АҚШ ва Эрон ўт очишни тўхтатишга келишган, бироқ кўп ўтмай ҳар икки томон бир-бирини тинчлик режимини бузганликда айблаган.
Октябр охирида АҚШ Форс кўрфази давлатларини оралиқ сайловлардан кейин минтақада қисқа, аммо шиддатли ҳарбий амалиёт ўтказиши мумкинлиги ҳақида огоҳлантирган. Шу билан бирга, АҚШ вице-президенти Жей Ди Венс Эрон Миллий хавфсизлик олий кенгаши котиби Моҳсен Ризоий билан боғланиб, Теҳрон ва Вашингтон ўртасида келишувга эришиш учун етарлича умумий нуқталар бор-йўқлигини аниқлашга уринган.
Ризоий яқинда АҚШ Эроннинг етти шартини қабул қилган тақдирдагина музокаралар бошланишини айтган эди. Бу шартлар июн ойида Исломободда тузилган меморандум мазмунидан фарқ қилади. Теҳрон талаблар бажарилмагунча музокаралар бошланмаслигини билдирган.
Маълумот учун, 27-октябр куни Исроилда парламент сайловлари бўлиб ўтди. Натижаларга кўра, Нетаняху блоки етакчиликни қўлга киритиб, Кнессетда 53 та ўринга эга бўлди. Бироқ бу ҳукумат тузиш учун етарли эмас. Энди партиялар ўзаро келишувга эришиши керак. Бу жараён узоқ давом этиши мумкин.