Трамп Эронга зарбаларни қайта бошлаш эҳтимолини истисно қилмади
АҚШ президенти Доналд Трамп Эрон билан музокаралар яқин кунларда қайта бошланишини кутаётганини билдирди. Аввалроқ у Теҳроннинг Ҳўрмуз бўғозида кемалар қатновини етти кун ичида тиклаш бўйича таклифини рад этган эди. Томонлар эҳтимолий келишувнинг қамрови ва шартлари юзасидан турлича позицияда қолмоқда.
**Трамп Эронга зарбаларни қайта бошлаш эҳтимолини инкор этмади**
Доналд Трамп 27-сентабр, якшанба куни Ахиос ахборот порталига телефон орқали берган интервюсида Эрон билан келаси ҳафтада янги музокаралар бўлишини кутаётганини айтди.
«Мен Эрон билан янги музокаралар бўлишини кутяпман. Улар келишув тузишни хоҳлаяпти, аммо бу мен тузмоқчи бўлган келишув эмас. Эҳтимол, бир йил олдин биз бундай шартларга рози бўлардик. Улар ўз кучларига ортиқча баҳо берган», - деди АҚШ президенти.
Эронга зарбаларни қайта бошлаш имкониятини кўриб чиқаётгани ҳақидаги саволга Трамп «бу ҳақда доим ўйлашини» айтди.
**Воситачилар учрашувлари 28-сентабрда ўтказилиши мумкин**
Ахиосънинг минтақадаги, исми ошкор этилишини истамаган икки манбаси ҳам АҚШ ва Эрон ўртасида мулоқот қайта бошланиши кутилаётганини тасдиқлаган.
Уларнинг маълумотига кўра, Вашингтон ва Теҳрон вакиллари ўртасидаги аввалги учрашувларда қатнашган Қатар воситачилари 28-сентабрдаёқ Эрон ташқи ишлар вазири Аббос Арағчи ҳамда АҚШ президентининг махсус вакили Стивен Уиткофф билан учрашувлар ўтказиши мумкин.
Бироқ нашр икки томон эҳтимолий келишув мазмунини турлича кўраётганига эътибор қаратган. Теҳрон музокараларда асосий урғуни Ҳўрмуз бўғозини тўлиқ очиш ва АҚШ томонидан ўрнатилган денгиз блокадасини бекор қилишга қаратмоқчи.
Вашингтон эса кенгроқ қамровли келишувни талаб қилмоқда. АҚШ бундай келишув Эроннинг ядровий дастури бўйича ён беришларини ҳам ўз ичига олиши керак, деб ҳисоблайди.
Бир неча кун аввал Аббос Арағчи Теҳрон Вашингтонга муайян шартлар бажарилса, Ҳўрмуз бўғозида кемалар қатновини бир ҳафта ичида тиклашни таклиф қилганини билдирган эди. Таклифда можарони узоқ муддатли тартибга солиш бўйича музокараларни қайта бошлаш ҳам назарда тутилган.
ОАВ маълумотларига кўра, Эрон илгари сурган шартлар орасида барча фронтларда, жумладан, Ливанда жанговар ҳаракатларни тўхтатиш, Эрон портлари блокадасини бекор қилиш, Теҳроннинг музлатилган активларини бўшатиш ва Эрон нефти экспортига қўйилган чекловларни олиб ташлаш бор.