Непалдаги янги сув тошқини бир нечта кўприк ва уйларни вайрон қилди
Непалнинг Будхи-Гандаки дарёсидаги табиий тўғон бузилиши оқибатида сув тошқини содир бўлди. Ўзанидан чиқиб кетган дарё сувлари бир нечта кўприк ва ўнлаб уйларни ювиб кетди ҳамда ГЕС қурувчиларининг лагерини вайрон қилди.
Непалда юз берган янги сув тошқини бир нечта кўприк ва уйларни вайрон қилди. Хабарларга кўра, дарё бўйида яшовчи қарийб 50 киши қутқарилган, беш киши эса ҳануз бедарак йўқолган.
Мутахассислар айтишича, табиий тўғон бир муддат аввал Будхи-Гандаки дарёси оқиб ўтадиган дарада юз берган тош кўчкиси натижасида шаклланган. Сув тўлиб, босим кучайгани сабаб тўғон ёрилиб кетган ва кучли оқим пастга қараб оқиб тушган.
Икки соат ичида дарёдаги сув сатҳи 2 метрдан 8,5 метргача кўтарилган. Ҳукумат оқим етиб келишидан 20-30 дақиқа олдин аҳолини огоҳлантиришга улгурган, шундан сўнг кўплаб одамлар тепаликларга чиқиб олган.
Тошқин ГЕС қурувчилари қурилиш материаллари ва техникани ташишда фойдаланадиган Бейли кўпригини ҳамда бир нечта осма кўприкни вайрон қилган. Дарё бўйи бўйлаб жойлашган электр узатиш линиялари ва уйларни сув оқизиб кетган.
Бир неча кун аввал Непалда август охирида юз берган сув тошқини қурбонларини қидириш операцияси якунланган эди. Табиий офат оқибатида ҳалок бўлганлар сони 1455 нафар деб эълон қилинган, 5285 киши бедарак йўқолган деб ҳисобланмоқда.