Навоий вилоятида вояга етмаган қизга шилқимлик қилган ишчи беш суткага қамалди

Навоий вилоятида вояга етмаган қизга шилқимлик қилган ишчи беш суткага қамалди

Навоий вилояти Қизилтепа туманидаги «Тоза ҳудуд» давлат унитар корхонаси ишчиси вояга етмаган қизга шилқимлик қилгани учун беш суткалик қамоқ жазосига ҳукм қилинди.

Ҳуқуқ-тартибот идоралари ходимлари томонидан аниқланишича, 24 ёшли У.Н. исмли шахс қиз билан Instagram ижтимоий тармоғи орқали танишган.

2026 йил 19 сентябрь куни У.Н. қизга буюртмаси борлигини айтиб, уни тумандаги дўконлардан бирига чақирган. Қиз келганидан сўнг, ундан ўзи бошқариб келган «Damas» русумли машинага ўтиришини сўраган.

Машина ичида У.Н. Instagram’да ўзини Темур деб таништирганига қарамай, асл исми бошқа эканлигини айтган. Шунингдек, у хотини ва икки нафар фарзанди борлигини маълум қилган. Сўнгра қизни яхши кўриб қолганини айтиб, унинг қўлидан ушлаган ва шаҳвоний мазмундаги гаплар гапирган.

«Шундан сўнг қизим шок ҳолатига тушиб, машинадан тушиб кетмоқчи бўлган. Лекин у қизимнинг қўлидан ушлаб, қўйиб юбормаган», — дейди қизнинг онаси ўз кўрсатмасида.

Суд У.Н.ни Маъмурий жавобгарлик тўғрисидаги кодекснинг 41-1-моддаси 1-қисмида назарда тутилган ҳуқуқбузарликни содир этганликда айбдор деб топди ва унга нисбатан 5 сутка маъмурий қамоқ жазосини тайинлади.