МинстройЖКХ Тошкентдаги ноқонуний кўп қаватли уйлар ҳақидаги маълумотларни тўғрилади: 720 та эмас, 61 та
Тошкентда аввал қурилиш ва уй-жой коммунал хўжалиги вазири Шерзод Хидоятов томонидан маълум қилинганидек 720 тадан ортиқ эмас, балки 61 та ноқонуний қурилган кўп қаватли уй аниқланди. Вазирлик хатони тан олди ва узр сўради. Пойтахтда жами 320 тадан ортиқ ноқонуний қурилиш обьекти, жумладан, хусусий уйлар мавжуд.
Қурилиш ва УЖКХМ Тошкентдаги ноқонуний кўп қаватли уйлар бўйича маълумотларга аниқлик киритди: 720 та эмас, 61 та
Ўзбекистон Қурилиш ва уй-жой коммунал хўжалиги вазирлиги 22 октябрь куни Тошкентда ноқонуний қурилган кўп хонадонли уйлар сони бўйича изоҳ эълон қилди.
Идоранинг хабар беришича, пойтахтда 320 дан ортиқ ноқонуний қурилиш объекти аниқланган. Ушбу сонга турли тоифадаги бино ва иншоотлар, жумладан, якка тартибдаги турар жойлар, кичик дўконлар, савдо шохобчалари ва павильонлар киради.
Бунда ноқонуний қурилган кўп хонадонли уйлар сони 61 тани ташкил этади.
«Биз томонимиздан тақдим этилган жавобда қурилиш объектларининг умумий сони янглишиб кўп хонадонли уйлар сони сифатида кўрсатилган. Ушбу хатолик учун узр сўраймиз», — дейилади вазирлик хабарида.
Идора, шунингдек, журналистлар ва ижтимоий тармоқлардаги нашрлар муаллифларидан аниқлаштирилган маълумотларни инобатга олишни сўради.
Eслатиб ўтамиз, 13 октябрь куни Олий Мажлис Қонунчилик палатасидаги «Ҳукумат соати»да қурилиш ва УЖКХ вазири Шерзод Ҳидоятов биргина Тошкентнинг ўзида архитектура органларининг рухсатисиз қурилган 720 дан ортиқ кўп хонадонли уй борлигини маълум қилган эди.
Унинг сўзларига кўра, кўплаб тадбиркорлар 2024 йил охирида пойтахтнинг бош режаси тасдиқлангунга қадар аукционлар орқали сотиб олинган ер участкаларида уй-жойлар қурган.
«Бугунги кунда бу жуда оғриқли муаммога айланди. Биргина Тошкентнинг ўзида 720 дан ортиқ ана шундай кўп қаватли уйлар бор. Биз бутун республика бўйича қурилган уйларни хатловдан ўтказдик. Булар архитектура органларининг рухсатисиз қурилган муаммоли объектлардир», — деган эди ўшанда Ҳидоятов.
Вазир ушбу объектлар билан Бош прокуратура шуғулланаётганини маълум қилди.
У, шунингдек, бундай уйларни фойдаланишга қабул қилиш тартиби ишлаб чиқилаётгани ҳақида гапирди. Бунинг учун биноларнинг шаҳарсозлик талабларига, жумладан, болалар майдончалари ва автотурагоҳлар мавжудлигига мувофиқлигини таъминлаш, шунингдек, инструментал текширув ёрдамида уларнинг мустаҳкамлигини текшириш зарур бўлади.
Бу ҳолатда, унинг сўзларига кўра, сейсмик хавфсизлик ва қонунийлик бўйича саволлар туғилмайди.