Месси жарима зарбаларидан урилган голлар бўйича иккинчи ўринга кўтарилди
Месси жарима зарбаларидан урилган голлар бўйича иккинчи поғонага чиқди
“Интер Маями” ҳужумчиси Лионел Месси футбол тарихида жарима зарбасидан киритилган голлар сони бўйича иккинчи ўринга кўтарилди.
“Интер Маями” МЛС мунтазам чемпионати доирасида ўз майдонида “Сан-Диего” билан 2:2 ҳисобида дуранг қайд этди. Месси ушбу учрашувда жарима зарбасидан гол уриб, бундай голлари сонини 75 тага етказди. Шу тариқа у бразилиялик Жаирни (74 та гол) ортда қолдирди. Криштиану Роналду ҳисобида жарима зарбаларидан урилган 64 та гол бор.
Месси 39 ёшда ва 2023-йилдан бери “Интер Маями” сафида ўйнаб келмоқда. Европада аргентиналик футболчи Франсиянинг “ПСЖ” ҳамда Испаниянинг “Барселона” клубларида тўп сурган. “Барселона” билан у тўрт марта Чемпионлар Лигасида, уч мартадан УЕФА Суперкубоги ва клублар ўртасидаги Жаҳон чемпионатида ғолиб чиққан.
Ҳужумчи 2022-йилги Жаҳон чемпионатининг олтин, 2014 ва 2026-йилги мундиалларнинг кумуш медали соҳиби, 2008-йилги Олимпиада чемпиони ҳамда Америка Кубогининг икки карра (2021, 2024) ғолиби ҳисобланади. Месси “Олтин тўп”ни қўлга киритиш бўйича рекордчи бўлиб, аргентиналик футболчи ушбу совринни саккиз марта ютган.