Месси Аргентина терма жамоасидаги фаолиятини якунлади
Лионел Месси Аргентина терма жамоасидаги фаолиятини якунлаганини эълон қилди. Бу ҳақда саккиз карра "Олтин тўп" соҳиби ўзининг Инстаграм саҳифаси орқали маълум қилди.
"Жаҳон чемпионати финалидан кейин, ҳамма нарсани яхшилаб ўйлаб кўрганимдан сўнг, терма жамоадан кетаётганимни маълум қилмоқчиман. Бу қарор мен учун оғриқли бўлди ва ҳануз қалбимни яраламоқда. Аммо энди вақти келганини тушунаман. Ишонтириб айтаманки, мен ҳар доим бор кучимни бердим — нафақат сўнгги йилларда, барча совринларни қўлга киритганимизда, балки ундан олдин ҳам. Мен доимо шу либос учун курашдим ва сизларга қувонч улашиш, аргентиналик эканингиздан фахрланишингиз учун боримни бердим", — деб ёзди Месси.
39 ёшли футболчи терма жамоадаги дебютини 2005-йил августида ўтказган. Ҳужумчи учун "албиселесте" сафидаги сўнгги учрашув 19-июл куни Испанияга қарши 2026-йилги Жаҳон чемпионати финали бўлди.
Аввалроқ "Интер Маями" ҳужумчиси МЛС доирасидаги "Монреал"га қарши ўйинда рақиб дарвозасига 4 та гол урган эди. Ушбу учрашувда маямиликлар 7:1 ҳисобида ғалаба қозонди.
Маълумот ўрнида, Месси АҚШ чемпионатига кўчиб ўтгунига қадар Испаниянинг "Барселона" ҳамда Франсиянинг "ПСЖ" жамоалари шарафини ҳимоя қилган. Умуман олганда, Месси фаолияти давомида 1164 та учрашувда иштирок этиб, ўз ҳисобига 927 та гол ёздириб қўйган.