«Мени кутма, азизим…» - Роналду миллий терма жамоага қайтишни истамаяпти
Уч ҳафта аввал Португалия миллий терма жамоаси йиғинини ўзбошимчалик билан тарк этган Криштиану Роналду билан бўлган можаро янги тафсилотлар билан бойимоқда. Беш карра «Олтин тўп» соҳиби ўзбошимчалиги учун мамлакат футбол федерациясидан ўта енгил - амалда рамзий жазо олган бўлса-да, энди миллий жамоага қайтишни истамаётгандек.
«Мени кутма, азизим…» - Роналду миллий терма жамоага қайтишни истамаяпти
Криштиану Роналду Португалия миллий терма жамоасининг яқин кунлардаги ўйинларига «чақирилмасликни афзал кўраётгани» ҳақида СНН Португал журналисти хабар берди.
Унинг айтишича, Роналду мамлакат футбол федерацияси раҳбариятидан ранжиган. У ўзига нисбатан «адолациз муносабатда бўлишган», деб ҳисоблайди, «ўзини хиёнатга учрагандек ҳис қилмоқда» ва «ҳақиқат у тарафида эканига қатъий ишонмоқда».
Португалия футбол федерацияси (ФПФ) ва Криштиану Роналду ўртасидаги зиддият сентабр охирларида очиқ тус олди. Ойнинг сўнгги куни 41 ёшли ҳужумчи миллий жамоа йиғини давом этаётган пайтда кутилмаганда жамоа қароргоҳини тарк этди. Роналду норвегияликларга қарши ўйинда юз берган ҳолатдан норозилигини шу тариқа билдирди. Бу учрашув футболчи учун миллий жамоа сафидаги 235-ўйин бўлиши мумкин эди. Бироқ жамоа сардори захирада қолди. Иккинчи бўлимда у узоқ вақт майдон четида қизиди, аммо захирадан майдонга туширилмади.
Сўнгги пайтларда миллий жамоага катта фойда келтира олмаётган Роналдунинг йўқлиги португалияликларга салбий таъсир кўрсатмади. Португалия Миллатлар лигасидаги тўртта ўйинни ҳам ғалаба билан якунлади.
Орадан кўп ўтмай ФПФ раҳбари Педру Пруенса ва жамоа бош мураббийи Жоржи Жезуш футболдан ҳам қизиқроқ бўлиб қолган ушбу мавзуга яна қайтишди. Улар муросага тайёр эканликларини айтиб, юлдуз футболчи билан музокара ўтказишга рози бўлишди.
19-октабр куни ФПФ эълон қилган жазо Португалия футбол раҳбарларининг ўз афсонасига ниҳоятда юмшоқ муносабатда бўлаётганининг навбатдаги далили бўлди. Криштиану Роналду терма жамоа йиғинини ўзбошимчалик билан тарк этгани учун миллий жамоадан 30 кунга четлатилди. Бу қоидага кўра белгиланиши мумкин бўлган энг қисқа муддат эди. Бундан ташқари, жазо муддати қоидабузарлик содир этилган кундан — 30-сентабрдан бошлаб ҳисобланиши керак эди. Бу эса Роналдунинг амалда терма жамоадан четлатилмаганини англатарди. Чунки Португалия миллий жамоаси навбатдаги ўйинларини 14 ва 17-ноябр кунлари Дания ҳамда Уелсга қарши ўтказади. Шунингдек, ФПФ футболчини 255 евро жаримага ҳам тортди. Бу сумма Роналдунинг даромадларини ҳисобга олганда (футболчи «Ал-Насср» клубида ҳафтасига 4 миллион еврога яқин пул ишлайди), жуда кулгили. Бундай енгил жазо ОАВда ҳазил ва масхара мавзусига айланди.
Яна бир жиҳат ҳам алоҳида кулгига сабаб бўлди: ФПФнинг 29 саҳифалик қарорида айтилишича, Криштиану Роналду жазони енгиллаштирувчи ҳолат сифатида ўзининг футболдаги хизматларини ҳисобга олишни сўраган ва ҳатто «резюмесининг нусхаси»ни тақдим этган. Тартиб-интизом қўмитаси унинг «футбол ривожига қўшган ҳиссаси»ни ҳамда «пушаймонлигини намоён этгани»ни енгиллаштирувчи омил сифатида инобатга олган.