Мен олиб қочиб кетилган самолёт уйим устидан учиб ўтганини кузатдим - бир неча дақиқадан сўнг рафиқам 11 сентябрь фожиасида ҳалок бўлди

Олиб қочирилган самолёт уйим устидан учиб ўтганини кузатдим - бир неча сониядан сўнг рафиқам 11 сентябрь фожиасида ҳалок бўлди

Чарльз Вульф рафиқаси Кэтринни учратганида «энг катта ютуқни қўлга киритганини» айтди

Бундан 25 йил аввал қуёшли тонгда Чарльз Вульфнинг Нью-Йоркдаги квартираси устидан самолёт пастлаб учиб ўтганда, у дарҳол нимадир нотўғри эканлигини ҳис қилди.

Бир неча сониядан сўнг, ҳаво кемаси Жаҳон савдо марказининг шимолий минорасига бориб урилди - у ерда унинг Суонсидан бўлган рафиқаси Кэтрин ишлаётган эди.

Кэтрин ўша заҳоти вафот этди ва 2001 йил 11 сентябрда АҚШда Ал-Қоида террорчилик ҳужумлари оқибатида ҳалок бўлган 2977 кишидан бирига айланди.

Кейинчалик қурбонларнинг оилалари ва қарамоғидаги шахсларга адолатли товон пули тўланишини таъминлаш кампаниясига раҳбарлик қилган Чарльз унинг «ажойиб» рафиқаси у курашган ишлардан фахрланишини айтди.

Кэтрин Вульф шимолий миноранинг 97-қаватида Marsh and McLennan суғурта компаниясида ишлаётган эди.

Чарльз Кэтринни илк бор 1988 йилда Нью-Йоркда, ўзи театр гуруҳида куйлаб юрган, у эса пианиночи бўлиб жўрлик қилаётган вақтда учратган.

«Биз репетиция зали ташқарисида мутлақо тасодифан учрашиб қолдик ва тахминан икки дақиқада бир-биримизни севиб қолдик, тамом», деди у.

Чарльз уни учратганида «энг катта ютуқни қўлга киритганини» айтиб, қўшимча қилди: «Бизни ажратиб бўлмасди».

Кэтрин 1989 йилда Чарльзни Буюк Британияга саёҳатга олиб борди, шу жумладан Уэльснинг у «талаффуз қила олмаслигини» тан олган жойларига, жумладан Махинлет ва Лланвайрпуллгвингиллга ҳам боришди.

«Бу фақат бошланиши эди», деди Чарльз.

«Бизнинг жуда ажойиб, жуда гўзал муносабатларимиз бор эди».

2001 йил 11 сентябрь куни соат 08:06 да (EDT) Чарльз Нью-Йоркдаги квартираларида Кэтрин билан охирги марта хайрлашиб, ундан ўпди.

Орадан роппа-роса 40 дақиқа ўтгач, реактив самолёт миноранинг 97-қаватига - у икки ҳафтадан камроқ вақт олдин бошлаган янги ишида ишлаётган қаватга бориб урилди.

«Самолёт биномиз - биз яшайдиган уй устидан учиб ўтганда, бу тўлиқ қувват билан ишлаётган икки двигателли реактив самолёт эканлигини дарҳол англадим», деди тажрибали учувчи Чарльз.

«Буни шу қадар яхши тушундимки, ФҚБга қўнғироқ қилиб: "Бу тасодиф эмас, бу атайлаб қилинди", дедим».

Бир йил ўтгач, Чарльз ўша қўнғироқни қабул қилган ФҚБ агенти билан учрашганда, агент унга шундай деган: «Сиз бизга бунинг тасодиф эмаслиги ҳақидаги фактни биринчи бўлиб етказган одам эдингиз».

Чарльз ҳаётида Кэтрин бўлганидан ўзини бахтли деб ҳисоблайди.

Кэтрин эрига «биринчи бинода» ишлаётганини айтган эди. Биринчи самолёт урилганидан сўнг, янгиликлар хабарларида Эгизак миноралар «шимолий ва жанубий» деб тилга олинди - Чарльз эса қайси бири қайси эканлигини билмас эди.

Аммо уйидан бир миля узоқликдан у тутун кўтарилаётганини кўриши мумкин эди.

«Унга телефон орқали боғлана олмадим. Самолёт бинога урилган сонияда у ҳаётдан кўз юмганини хаёлимга ҳам келтирмагандим», деди у.

Чарльз уч кундан кейин унинг иш берувчиларидан шимолий миноранинг 91-қаватидан юқорида - Кэтриннинг офисидан олти қават пастда бўлган ҳеч ким қутулиб қола олмагани ҳақида тасдиқ олгунга қадар «фақат энг ёмон нарсани тахмин қила олди».

«У бу содир бўлишини билмасди ва ҳеч нарсани ҳис қилмади», деди у.

«Аслида... у ердаги унинг барча ҳамкасблари бир лаҳзада буғланиб кетишди».

У қўшимча қилди: «Бу келаётганини ҳеч қачон била олмасдингиз - соатига 450 миля (724 км/соат) тезликда бунинг иложи йўқ эди.

Уни йўқотганим бахт эмас. Унинг бу содир бўлганини ҳеч қачон билмагани бир таскин, ва мен бундан миннатдорман.

Бу ҳаммага ҳам насиб этмади. Баъзи одамлар қолиб, ёниб кулга айланиш ёки юқори қаватлардан пастга сакраш қарорини қабул қилишлари керак эди».

Ҳужумлардан сўнг Чарльз ҳужум қурбонларининг оилалари ва қарамоғидаги шахсларга адолатли товон пули тўланишини таъминлаш кампаниясига раҳбарлик қилди.

Ҳужумларда жами 2977 киши - 19 нафар террорчини ҳисобга олмаганда - ҳалок бўлди. Яна минглаб одамлар жароҳат олди ёки кейинчалик ҳужумлар билан боғлиқ касалликларга чалинди, жумладан заҳарли вайроналар орасида ишлаган ўт ўчирувчилар ҳам.

АҚШ ҳукумати томонидан бошқариладиган 11 сентябрь қурбонларини компенсация қилиш жамғармасидан қониқмаган Чарльз расмийларни маблағларни адолатлироқ ва кўпроқ одамларга тақсимлашга муваффаққиятли ундади.

Унинг кампанияси кейинчалик Netflix компаниясининг «Worth» (Лойиқ) номли фильмига мавзу бўлди, унда унинг ролини актёр Стэнли Туччи ижро этган.

Нью-Йоркдан туриб Чарльз рафиқаси Кэтрин «маъқуллаб ва тушунган ҳолда табассум қилишини» айтди.

«У: "Буни уддалай олишингни билардим", деган бўларди.

Кэтрин менга мутлақо ишонарди. У ажойиб, чиндан ҳам ажойиб эди».

Уэльс Биринчи вазири Рюн ап Иорверт BBC журналисти сифатида ишлаётганда 11 сентябрь оқибатларини ёритган.

У рафиқаси Ллинос ва қизи билан таътилда эди ва Уэльсдан Нью-Йоркда уларга қўшилиш учун учиб келган Ллиноснинг ота-онаси билан учрашиш учун Вермонтдан йўлга чиққан эди.

Илгари Нью-Йоркда бўлган бўлса-да, у шундай деди: «Етиб келганим ва бу мутлақо бошқача шаҳар бўлганини эслайман.

Ҳидни ҳалиям эслайман - куйик ҳиди.

Бу жасур шаҳар жимжит бўлиб қолганди. Нью-Йорк кўчаларида яққол сезилиб турган карахтлик ҳиссини эслайман».

Биринчи вазирнинг айтишича, сўнгги 25 йиллик тарихнинг катта қисми «ўша воқеадан келиб чиққан».

«"Террорга қарши уруш"нинг бошланиши, кескинликлар, исламофобия, геосиёсатнинг шаклланиш тарзи».

У қўшимча қилди: «Биз, ҳатто энг даҳшатли вазиятларда ҳам, совуққонлик кераклигини ўргандик».

Ўтган дам олиш кунлари Буюк Британиядан 200 дан ортиқ ўт ўчирувчилар 11 сентябрнинг 25 йиллигини нишонлаш учун Атлантада (Жоржия штати) тўлиқ шахсий ҳимоя воситаларини (PPE) кийган ҳолда 110 қаватга - тахминан 2226 зинага кўтарилишди.

Иштирок этган ҳар бир қутқарувчи ҳужумларга жавоб бериш пайтида ҳалок бўлган 343 нафар ўт ўчирувчидан бирини ифодалади.

Ўрта ва Ғарбий Уэльс ёнғин-қутқарув хизмати станцияси менежери Карл Уильямс ўз ҳамкасбларидан саккиз нафари билан ушбу тадбирда иштирок этди ва буни «жуда камтарлик бағишловчи» деб таърифлади.

«Охирида жуда таъсирли бўлди, кўп одамлар масофани тугатиб, йиғлашарди», деди у.

«Одамлар ҳаётини йўқотгани ортидаги ҳиссиётларни тушунишга ҳаракат қилишни қўятуринг, шунчаки зинага кўтарилиш вазифасини бажаришнинг ўзи катта гап.

Ҳеч ким ишга бориб, ўша куни уйга қайтмасликни кутмайди».