Мексика тўдаси қўлга олинган аъзосини озод қилишга мажбурлаш учун мулозимларни ўғирлаб кетди
Тўда мулозимларни ўзларининг юқори мансабли аъзоси қўлга олинганидан кўп ўтмай гаровга олди ва уни озод қилишни талаб қилди.
Мексика тўдаси қўлга олинган аъзосини озод қилишга мажбурлаш учун мулозимларни ўғирлаб кетди
Дўшанба куни Мексикадаги жиноий тўда мамлакат марказидаги Морелос штатида уч нафар мулозимни ўғирлаб кетди. Бундан мақсад ҳокимият органларига босим ўтказиб, бир неча соат олдин қўлга олинган тўданинг юқори лавозимли аъзоларидан бирини озод қилишга эришиш бўлган.
Морелос штати бош прокуратураси товламачиликка қарши кампания доирасида ўтказилган рейддан сўнг «Pueblos Unidos» жиноий тўдаси аъзосини ҳибсга олганини маълум қилди.
Бунга жавобан «Pueblos Unidos» бош прокуратуранинг уч нафар ходимини ўғирлаб кетиб, уларни гаровда ушлаб турди.
Идора ўз баёнотида ходимларининг ҳаётини сақлаб қолиш учун қўлга олинган гумонланувчини озод қилганини, аммо ходимларнинг ўғирлаб кетилиши жазосиз қолмаслигини таъкидлади.
Баёнотда қўшимча қилинишича, тўда дўшанба куни кечқурун маҳаллий вақт билан учала ходимни ҳам озод қилган. Улардан бири ўқдан олинган жароҳат билан шифохонага ётқизилган, аммо аҳволи барқарор.
Баёнотга кўра, қўлга олинган тўда аъзосини озод қилиш ҳақидаги қарор ўғирланган қурбонларнинг ҳаёти биринчи ўринда туриши кераклиги кўрсатилган расмий кўрсатмаларга мувофиқ қабул қилинган.
Мексикадаги жиноий тўдалар кўпинча ўз етакчиларидан бири ҳибсга олинганидан сўнг, уни озод қилишга мажбурлаш мақсадида зўравонлик тўлқинини авж олдирадилар.
2019 йилда «Синалоа» картелининг юзлаб қуролланган аъзолари картель асосчиси, донг таратган Хоакин «Эл Чапо» Гусманнинг ўғли Овидио Гусман ҳибсга олинганидан сўнг Мексика шимолидаги Кулиакан шаҳрига ёпирилиб кирди.
Улар ёнаётган тўсиқлар ўрнатиб, хавфсизлик кучлари билан ўлимга олиб келувчи отишмалар олиб боришди.
Зўравонлик шу қадар шиддатли эдики, ўша пайтдаги президент Андрес Мануэль Лопес Обрадор шахсан Овидио Гусманни озод қилиш ҳақида буйруқ берди.
Лопес Обрадор бу буйруқни «аҳолини хавф остига қўймаслик учун» берганини айтди.
«Жиноятчининг қўлга олиниши одамларнинг ҳаётидан устун эмас», — дея қўшимча қилди у.
Гусман 2023 йилда қайта қўлга олинди ва АҚШга экстрадиция қилинди.
Яқинда, жорий йилнинг февраль ойида Мексикада энг кўп қидирувда бўлган жиноятчилардан бири Немесио «Эл Менчо» Осегеранинг ўлдирилиши унинг картели томонидан Мексиканинг 20 та штатида қасос ҳужумларини келтириб чиқарди.
Президент Клаудия Шейнбаум зўравонликларни бостириш учун жабрланган штатларга минглаб аскарларни юборди.