Мартинесда қўрқинчли жароҳат, Ҳоландда дубл. Кун ўйинлари
«Челси» сафарда муҳим ғалабага эришди, аммо жиддий йўқотишга учради; «Ливерпул» рақиби икки қизил олган ўйинда камбекка эришди; «Сити» мавсум стартида қаторасига 7 ўйиндан иборат ғалабали серия қайд этмоқда, Ҳусанов иккинчи бўлимда жароҳат олган футболчи ўрнига туширилди. Шанба куни Европа чемпионатларида рўй берган асосий воқеалар, ўйинлардаги голлар ва турнир жадвалларидаги вазият.
Мартинеснинг даҳшатли жароҳати, Ҳоланднинг дубли. Ўйинлар куни
«Эвертон» – «Челси» 0:2
Голлар:
Педру Нету, 46 (0:1). Педру Нету, 90 (0:2)
«Эвертон»: Пикфорд, Брантуейт, Тарковски, Миколенко, Мейтланд-Найлс (Жорж, 55), Гарнер, Армстронг (Норгар, 85), Дюсбери-Ҳолл, Грилиш (Жонсон, 85), Рел, Барри
«Челси»: Мартинес (Пендерс, 75), Лакруа, Колвилл, Хато (Палестра, 90), Ачимпонг, Ҳендерсон, Кайседо (Лавиа, 90), Палмер, Роджерс, Педру Нету (Уелбек, 90), Жоао Педро (Кенда, 90)
Огоҳлантиришлар: Армстронг, 23. Тарковски, 34. Норгар, 89 – Педру Нету, 27. Ачимпонг, 32. Роджерс, 34. Палмер, 65
6-турдан сўнг бешинчи ўринга кўтарилиб олган ва мавсумни мағлубияциз давом эттираётган «Эвертон» илк 45 дақиқада турнир жадвалида ўзидан пастда турган «Челси»ни ўзига хос, яккакурашларга таянган футболга мажбур қила олди. Баҳсда тез-тез тўқнашувлар ва тўхталишлар кузатилди, фақат бўлим охирларида Пикфордга иш тушди. Аввал Кайседонинг зарбасидан кейин тўп дарвоза тўсинига тегди, сал ўтиб эса Англия миллий жамоаси дарвозабони Педру Нетунинг зарбасидан кейин тўсин остидан кириб кетаётган тўпни қайтариб қолди.
Иккинчи бўлим эса Ҳаби Алонсо жамоасининг тезкор голи билан бошланди. Босимни кучайтирган лондонликлар тўпни олиб қўйиб, тезкор қарши ҳужумда мақсадига етди. Роджерс чап қанотдан олдинга чиққан ҳимоячи Ҳатони тўп билан таъминлади, у эса жарима майдонига кириб бориб, марказда бўш турган Нетуга голли пас узатди. Орадан кўп ўтмай португалиялик вингер яна бир қулай имкониятдан фойдалана олмади.
Учрашувнинг 65-дақиқасида хавотирли ҳолат юз берди. «Эвертон» лондонликлар дарвозаси томон жарима зарбаси тепиш ҳуқуқини олди: Кирнан Дюсбери-Ҳолл тўпни дарвозабон майдончаси томон оширди, у ерда эса меҳмонлар дарвозабони Эмилиано Мартинес ва мезбонлар ҳимоячиси Жарред Брантуейт тўқнашиб кетди. Икки футболчи бош билан уришиб, газонга қулади.
«Эвертон» футболчиси дарҳол оёққа турди, аргентиналик дарвозабоннинг жароҳати эса жиддийроқ чиқди ва унга 10 дақиқа давомида тиббий ёрдам кўрсатилди. Шу вақт ичида ўйин тўхтатиб турилди, охир-оқибат футболчи замбилда майдондан олиб чиқилди ва шифохонага етказилди. У энди икки ойгача жамоасига ёрдам бера олмаслиги айтилмоқда.