“Манчестер Сити” “Челси” вингерига “кўз тикди”
“Манчестер Сити” “Челси” вингери Педру Нетуни сотиб олишга қизиқиш билдирмоқда, бироқ Лондон клуби 26 ёшли португалиялик футболчи учун белгиланган нархни тушириш ниятида эмас. Бу эса трансфер бўйича музокараларни мураккаблаштириши мумкин.
Инсайдер Фабрицио Романонинг хабар беришича, “Манчестер Сити” Нету учун “Челси” талаб қилаётган суммадан сезиларли даражада камроқ маблағ таклиф қилишни режалаштирган. “Кўклар” раҳбарияти эса ўз позициясида қатъий турибди ва футболчини арзон нархда сотишни истамаяпти.
Агар трансфер амалга ошса, Нету “Манчестер Сити”да Энсо Мареска билан яна бирга ишлаши мумкин. Португалиялик футболчи аввалроқ “Челси”да италиялик мутахассис қўл остида ўйнаган. Унинг Лондон клуби билан амалдаги шартномаси 2031-йилнинг ёзига қадар мўлжалланган.
Трансфермаркт Нетунинг бозор қийматини 60 миллион еврога баҳоламоқда. Шунингдек, футболчига “Арсенал”, “Ливерпул” ва “Тоттенҳем” томонидан ҳам қизиқиш бўлгани ҳақида хабарлар тарқалган. Ҳозирча “Манчестер Сити” ва “Челси” ўртасида трансфер бўйича расмий келишув мавжуд эмас.