Марказий банк: 2027-йилда инфлясия 5 фоизга тушиши кутилмоқда
2026-йил биринчи ярмида иқтисодиёт 8,5 фоиз ўсди, инфлясия 6,4 фоизга тушди ва Марказий банк 2027-йил
Марказий банк: 2027-йилда инфлясия 5 фоизга тушиши кутилмоқда
Марказий банкнинг 2026-йил иккинчи чорак учун пул-кредит сиёсати шарҳида йилнинг биринчи ярмида реал иқтисодий ўсиш 8,5 фоизга етгани қайд этилган.
Аҳоли даромадлари 9,2 фоизга, реал иш ҳақи 10,8 фоизга ошган. Туристлар оқими қарийб 25 фоизга кўпайгани талабни қўллаб-қувватлаган. Асосий капиталга инвестициялар ҳам реал ҳисобда 17,5 фоизга ўсган. Бунда саноат, энергетика, инфратузилма ва қурилишдаги йирик лойиҳалар таъсири қайд этилган.
Иқтисодиётда ишлаб чиқариш тафовути ижобий қолган ва ялпи талаб жорий таклиф салоҳиятидан юқори бўлган. Давлат буджети биринчи ярим йилликни 1,8 трлн сўм профицит билан якунлаган.
Июн ойида умумий инфлясия йил бошидаги даражага нисбатан пасайиб, 6,4 фоизни ташкил этган. Базавий инфлясия эса 5,7 фоиз атрофида сақланган.
Нархи 5 фоиздан юқори ўсган товар ва хизматлар улуши қисқариши тўхтаган. Бу базавий инфлясион босимлар ҳали сусаймаганини кўрсатган. Аҳолининг инфлясион кутилмалари 10,1 фоиз, бизнес кутилмалари 9,9 фоиз бўлиб, ҳар икки кўрсаткич умумий инфлясиядан юқори шаклланган.
2026-йил 29-июлдаги йиғилишда Марказий банк асосий ставкани 14 фоиз даражасида ўзгаришсиз қолдирган. Инфлясия пасайиши ҳисобига чорак якунига келиб реал асосий ставка 7,1 фоизга ошган.
Базавий прогнозга кўра, 2026-йил якунида инфлясия 6,5 фоизни ташкил этади. 2027-йилда эса уни 5 фоизлик мақсадли кўрсаткичгача тушириш ва шу даражада барқарорлаштириш кутилмоқда. Базавий инфлясия 2026-йил охирида 6 фоиз, 2027-йилда 4,7 фоиз атрофида бўлиши прогноз қилинган.
Шу билан бирга, 2026-йил учун иқтисодий ўсиш прогнози 7–7,5 фоиздан 7,5–8 фоизга оширилган. Олтиндан ташқари экспорт ўсиши прогнози ҳам 12–16 фоиздан 19–23 фоизга юқорига қайта кўриб чиқилган.
Марказий банк инфлясия бўйича хатарлар мувозанати юқори даражага оғганини қайд этган. Ортиқча талаб, юқори инфлясион кутилмалар, энергия ва озиқ-овқат нархларининг ошиши ҳамда глобал молиявий шароитларнинг қатъий сақланиши инфлясияга босим ўтказиши мумкин.