Макрон 15 ёшгача бўлган болалар учун ижтимоий тармоқларни бутун ЕИ бўйлаб тақиқлашга чақирди
Эммануел Макрон Европа комиссияси раҳбари Урсула фон дер Ляенга мактуб йўллаб, болалар руҳий саломатлигини ҳимоялаш учун бутун ЕИ бўйлаб 15 ёшгача бўлганларга ижтимоий тармоқларни тақиқлашни таклиф қилди. Аввалроқ Франсия Конституциявий кенгаши шу мазмундаги миллий қонун лойиҳасини бекор қилганди.
Макрон 15 ёшгача бўлган болалар учун ижтимоий тармоқларни бутун ЕИ бўйлаб тақиқлашга чақирди
Франсия президенти Эммануел Макрон Европа комиссиясини 15 ёшгача бўлган болалар учун ижтимоий тармоқларни бутун Европа Иттифоқи ҳудудида тақиқлаш ташаббусини қўллаб-қувватлашга ундади.
Европа комиссияси президенти Урсула фон дер Ляенга 29-август санаси билан юборилган мактубида Макрон янги ЕИ қонунчилиги орқали иттифоқ миқёсида тақиқ жорий этиш энди кечиктириб бўлмайдиган масалага айланганини ёзган.
Бунга ёзда Франсия Конституциявий кенгаши сентабр ойида кучга кириши керак бўлган миллий қонун лойиҳасини бекор қилгани сабаб бўлди. Июл ойида Франсия парламенти 15 ёшдан кичик болалар учун ижтимоий тармоқлардан фойдаланишни тақиқловчи қонунни маъқуллаган ва мамлакат ЕИда бундай чекловни қабул қилган биринчи давлат бўлганди.
“Иттифоқ ҳудудидаги барча болаларни ҳимоя қилиш учун бу борада янада қатъий қадам ташлаш ва Европанинг янги қонун ҳужжати орқали 15 ёшгача бўлган болаларнинг ижтимоий медиа платформаларига киришини чеклаш бўйича ягона тартибни йўлга қўйиш зарур бўлиб қолди деб ҳисоблайман”, — деб ёзган Макрон.
Ўтган йили Австралияда болалар учун ижтимоий тармоқларни тақиқлаш бўйича муҳим қарор қабул қилингани ортидан, ижтимоий тармоқларнинг ёшлар руҳий саломатлиги ва хавфсизлигига таъсири борасидаги хавотирлар кучайгани сабаб Европанинг бир қатор давлатлари ҳам ўз чекловларини жорий этишни кўриб чиқмоқда. Бироқ айрим давлатлар, айниқса Скандинавия мамлакатлари, буни ота-оналарнинг ихтиёрига қолдириш маъқулроқ деб ҳисоблайди.
Ҳозирда Франсия президенти сифатидаги ваколат муддатининг сўнгги йилини ўтаётган Макрон 2027-йилда бўлиб ўтадиган навбатдаги президентлик сайловлари олдидан бу масалани устувор вазифа сифатида белгилаган. Унинг айтишича, Франсия Конституциявий кенгаш томонидан бекор қилинган қонун лойиҳасини алоҳида қайта ишлаб чиқади, бироқ парламентдаги сиёсий тарқоқлик ва мураккаб буджет музокаралари янги қонунни қабул қилиш жараёнини қийинлаштириши мумкин.
Фон дер Ляен июл ойида икки эксперт таклиф қилган кўп босқичли тизим тавсияларига таянган ҳолда, Европа Иттифоқи 27 та аъзо мамлакат ҳудудида кичик ёшдаги болаларнинг ижтимоий тармоқлардан фойдаланишини чеклаш йўлида қадам ташлашини билдирганди. Ушбу ёндашувга кўра, 13 ёшга тўлмаган болаларга фақат чекланган ва назорат остидаги рухсат берилади, ёш улғайган сари чекловлар босқичма-босқич юмшатиб борилади.