Ламин Ямал 91 йиллик рекордни янгилади
Ламин Ямал 91 йиллик рекордни янгилади
Каталониянинг "Барселона" клуби футболчиси Ламин Ямал "кўк-анорранглилар" сафида 50 ва ундан ортиқ гол урган энг ёш футболчига айланди. Бу тарихий натижа Испания Ла Лигасининг 3-туридан ўрин олган "Раё Вальекано"га қарши баҳсда (5:2) қайд этилди.
Мазкур ўйинда дубл қайд этган Ямал клуб тарихидаги 91 йиллик рекордни янгилади. Бунгача "Барселона" сафида 50 та гол урган энг ёш футболчи Хосеп Эскола бўлиб, у 1935-йилда 20 ёш-у 356 кунлигида ушбу натижага эришган эди.
Шу вақтга қадар Эсколанинг рекордига фақатгина Лионел Месси яқинлаша олган эди. Аргентиналик ҳужумчи клубдаги 50-голини 21 ёш-у 120 кунлигида урган. Янги рекорд ўрнатган Ламин Ямал эса айни пайтда бор-йўғи 19 ёш-у 49 кунлик.
Ламин Ямал "Барселона" академияси тарбияланувчиси бўлиб, 2023-йилдан бери асосий жамоа сафида ўйнаб келади. Футболчи ҳозирга қадар клуб таркибида жами 154 та учрашувда иштирок этиб, 51 та гол ва 52 та ассист муаллифига айланган.
Маълумот учун, Испания чемпионатидаги дастлабки учта ўйиндан сўнг 9 очко жамғарган "Барселона" турнир жадвалида пешқадамлик қилмоқда. Каталонияликлар навбатдаги учрашувини 6-сентябр куни "Валенсия"га қарши ўтказади.