Ламин Ямал “Барселона” раҳбариятидан норози бўлмоқда — ОАВ
Ламин Ямал "Барселона" раҳбариятидан норозилигини билдирмоқда — ОАВ хабари
"Барселона" ҳимоячиси Алехандро Балденинг клубдаги келажаги ноаниқлигича қолмоқда. Раҳбариятнинг футболчига нисбатан муносабати жамоа етакчиларидан бири Ламин Ямалнинг жиддий норозилигига сабаб бўлди.
Балде "Барселона"да қолишни ва асосий таркибдаги ўрнини қайтаришни истаган эди. Бироқ, раҳбарият билан бўлган бир неча суҳбатдан сўнг, футболчи жамоани тарк этиш ҳақида жиддий ўйлай бошлади.
Асосий муаммо шундаки, ҳимоячининг ўзига клуб уни сотиб юборишга уринаётгандек туюлмоқда. Ҳанси-Дитер Флик 22 ёшли футболчини "Элче"га қарши баҳсда ўйин қайдномасига киритмагач, вазият янада кескинлашди. Шундан сўнг мураббий ва футболчи ўртасидаги муносабатлар ёмонлашди. Флик Балденинг машғулотлардаги ҳаракатларидан норози, ҳимоячининг ўзи эса мураббий унга нисбатан адолацизлик қилган деб ҳисобламоқда.
Вазият фақат Балденинг ўзи билан чекланиб қолмади. Алехандро Ламин Ямалнинг энг яқин дўстларидан бири бўлиб, жамоадошининг бошига тушган ишлар испаниялик юлдузни бефарқ қолдирмади.
"Элче"га қарши ўйин вақтида камералар футболчининг кайфияти тушкун эканини пайқаган. Спорт нашри маълумотларига кўра, бунга асосий сабаб айнан Балде атрофидаги вазиятдир. Ямал дўсти учун қайғурмоқда ва "Барселона"нинг ўз футболчисига нисбатан қилаётган муомаласидан норози. Энди каталонияликлар нафақат Балденинг келажагини ҳал қилиши, балки жамоа ичида юзага келган мазкур можаро оқибатларини ҳам бартараф этиши керак бўлади.
Маълумот ўрнида, Алехандро Балде "Барселона" тарбияланувчиси бўлиб, клуб сафида бир қатор совринларни қўлга киритган. Ҳимоячи уч марта Испания чемпиони, бир марта мамлакат Кубоги ва уч бор Суперкубок соҳибига айланган. Айни пайтда унга "Манчестер Юнайтед", "Астон Вилла" ва "Бенфика" клублари қизиқиш билдирмоқда.