КХДР ва АҚШ музокараларни қайта бошлаши мумкин — Жанубий Корея разведкаси
**КХДР ва АҚШ музокараларни қайта бошлаши мумкин — Жанубий Корея разведкаси**
Жанубий Корея Миллий разведка хизмати (МРХ) брифингидан сўнг депутат Юн Гон Ённинг Реутерс агентлигига маълум қилишича, Шимолий Корея ва Қўшма Штатлар ўртасида музокаралар қайта бошланиши эҳтимоли мавжуд. Ҳозирча Пхенян ва Вашингтон ўртасида аниқ алоқалар ўрнатилгани тасдиқланмаган бўлса-да, депутатнинг сўзларига кўра, "Шимолий Корея—АҚШ саммитига келсак, музокаралар исталган вақтда бошланиши мумкин, деган баҳолаш бор".
АҚШ президенти Доналд Трамп август ойида Шимолий Корея етакчиси Ким Чен Ин билан 2026-йил охиригача учрашишни режалаштираётганини билдирган эди. Бу баёнот Трамп АҚШ ва Жанубий Корея ўртасидаги ҳар йилги қўшма ҳарбий машғулотларни кескин қисқартиришни буюрганидан сўнг янграган. Трамп ва Ким Чен Ин 2018—2019-йилларда уч марта учрашган.
**Ким Чжу Эннинг ворисликка тайёрланиши ва Россия-Украина уруши**
Жанубий Корея разведкаси Ким Чен Иннинг қизи Ким Чжу Эни унинг вориси сифатида тайёрлаш жараёни давом этаётганини тахмин қилмоқда. Разведка баҳосига кўра, Чжу Энинг Шимолий Корея давлат ОАВларида тез-тез кўриниш бериши ҳам уни ворис сифатида тайёрлаш жараёни билан боғлиқ.
Шунингдек, Жанубий Корея разведкаси Пхеняннинг Украинадаги урушда Россия томонида жанг қилиш учун қўшимча ҳарбийлар юбориш эҳтимолини ҳозирча "жуда паст" деб баҳолаган. Ким Чен Иннинг синглиси Ким Ё Чжон Украина президенти Владимир Зеленскийнинг Пхенян Россияга ёрдам бериш учун яна 50 минггача ҳарбий юборишни режалаштираётгани ҳақидаги даъвосини рад этган эди.
**Разведка маълумотлари ва КХДРнинг позицияси**
Брифингда иштирок этган яна бир депутат Ю Ён Ҳа Миллий разведка хизмати Шимолий Корея ракетасининг чизмаси ҳамда мамлакатдаги ҳукмрон партиянинг ички ҳужжатини қўлга киритганини маълум қилди, бироқ қўшимча тафсилотларни келтирмади.
Феврал ойида Ким Чен Ин Вашингтон "душманлик сиёсатини" тўхтаца, АҚШ билан келишувга тайёрлигини билдирган эди. Шу билан бирга, Пхенян ядровий қуролдан воз кечмаслигини таъкидлаб келмоқда. 2025-йил июлида Ким Ё Чжон АҚШ билан янги музокаралар Вашингтон КХДРнинг ядровий давлат мақомини тан олган тақдирдагина маънога эга бўлишини айтган. У Трамп ва Ким Чен Ин ўртасидаги шахсий муносабатлар "ёмон бўлмагани"ни ҳам қайд этган.
17-август куни Трамп Пентагонга Жанубий Корея билан ўтказиладиган 10 кунлик қўшма ҳарбий машғулотларни "сезиларли даражада қисқартириш"ни буюрди. У бунда Ким Чен Ин билан "жуда яхши муносабатлар"га эга эканини ҳам таъкидлаган. 19-августда эса Трамп кузда Ким Чен Ин билан учрашиш имкониятини кўриб чиқаётгани маълум бўлганди.