Трамп етти йил ўтгач, яна Ким Чен Ин билан учрашади
АҚШ собиқ президенти Доналд Трамп жорий йилда КХДР етакчиси Ким Чен Ин билан учрашишни кутаётганини маълум қилди.
Етти йиллик танаффусдан сўнг, Доналд Трамп яна Ким Чен Ин билан учрашиш ниятида эканлигини маълум қилди.
Оқ уй олдида журналистлар билан суҳбатлашар экан, сиёсатчи бу саволга ижобий жавоб берди: "Ҳа, мен шундай қиламан".
Трамп Шимолий Корея етакчиси билан муносабатлари яхши эканлигини таъкидлаб, шундай деди: "Ким Чен Ин билан муносабатларимиз яхши. Унда жуда қудратли 57 та ядро қуроли бор. Бунга йўл қўймаслик керак эди, аммо бу қуроллар унда бор. Мен уни жуда яхши биламан. Бизда ақлли президент бор экан, унинг ишлари яхши бўлади. Агар аҳмоқ президент бўлса, унинг ишлари яхши бўлмайди".
Тҳе Валл Стреет Жоурнал нашрининг хабар беришича, Трамп Пхенян ядровий дастури бўйича музокараларни қайта тиклаш мақсадида шу йилнинг кузида Ким Чен Ин билан учрашишни режалаштирмоқда.
Трамп ва Ким Чен Ин аввалроқ Америка етакчисининг биринчи президентлик даврида уч марта учрашишган: 2018-йилда бир марта ва 2019-йилда икки марта. Ўшанда денуклеаризация бўйича музокаралар КХДР ядровий инфратузилмасини йўқ қилиш шартлари бўйича томонлар келиша олмагани сабабли келишувсиз якунланган эди.
Шу ҳафта бошида Трамп Шимолий Корея етакчисининг мулоқот таклифига жавоб берганини айтиб, "Ким Чен Ин менга доим катта ҳурмат билан муносабатда бўлган", дея қўшимча қилган эди.