Кубада янги ўқув йили ўқитувчи етишмовчилиги шароитида бошланмоқда
1-сентабр куни Кубада қарийб 1,4 млн нафар ўқувчи янги ўқув йилини бошлайди. Бироқ мамлакатдаги иқтисодий ва энергетик инқироз таълим тизимига ҳам жиддий таъсир кўрсатмоқда: мактабларда ўқитувчилар билан таъминланганлик 73 фоизга тушган, бошланғич синф ўқувчилари учун мактаб формаларининг атиги 12 фоизи тайёр.
Кубада янги ўқув йили ўқитувчилар етишмовчилиги шароитида бошланмоқда.
Куба 2026-2027 ўқув йилини ўз вақтида бошлашга тайёрланмоқда. Бироқ, Реутерс хабарига кўра, мамлакатдаги ёқилғи, электр энергияси, транспорт ва зарур маҳсулотлар танқислиги мактабларни ҳам оғир аҳволга солиб қўйган.
Куба таълим вазири Наима Трухилонинг таъкидлашича, мамлакатдаги вазият мураккаблигича қолмоқда. Унинг сўзларига кўра, бундай шароитда янги ўқув йилини бошлашнинг ўзи катта ютуқдир.
**Ўқитувчилар нега мактабларни тарк этмоқда?**
Кубада педагоглар танқислигининг асосий сабабларидан бири – иш ҳақининг пастлиги ва мамлакатдаги иқтисодий қийинчиликлар. Инфляция шароитида ўқитувчиларнинг даромади кундалик эҳтиёжларни қоплашга етарли бўлмай қолгани сабабли, уларнинг бир қисми яхшироқ ҳақ тўланадиган бошқа ишга ўтган, яна бир қисми эса мамлакатни тарк этган.
Бу муаммо янги эмас: тадқиқотлар Кубада ўқитувчиларнинг бошқа соҳаларга кетиши 1990-йиллардан бери давом этаётганини ва бу педагоглар танқислигини узоқ муддатли муаммога айлантирганини кўрсатади.
Янги ўқув йилида бу бўшлиқни тўлдириш учун университет талабалари, бошқа соҳалар мутахассислари ва нафақадаги ўқитувчилар дарсларга жалб қилинади. Қўшимча юклама оладиган педагоглар учун қўшимча ҳақ тўлаш режалаштирилган.
Мамлакат пойтахти Гаванада вазият анча кескин. У ерда ўқитувчилар етишмаслигини қисман қоплаш учун мамлакатнинг шарқий ҳудудларидан қарийб 3 минг нафар педагог юборилади.
**Ўқувчиларга мактаб формаси ҳам етишмаяпти**
Муаммо фақат кадрлар масаласи билан чекланмайди. Кубада электр энергияси узилиши ва ишлаб чиқаришдаги қийинчиликлар мактаб формалари таъминотига ҳам таъсир қилган. Расмий маълумотларга кўра, бошланғич синф ўқувчилари учун зарур мактаб формаларининг атиги 12 фоизи ишлаб чиқарилган.
Шу сабабли Таълим вазирлиги мактабларни кийиниш масаласида мослашувчан бўлишга чақирди. Ўқувчилар мактаб формаси ўрнига қулай кийимда, анъанавий қизил галстуклари билан дарсга келишлари мумкин.
Электр ва транспорт муаммоси ҳам мактабларга таъсир қилмоқда.