Криштиану Роналду 4 нафар инвестор билан биргаликда "Ал-Наср"ни сотиб олиш бўйича таклиф тайёрламоқда

Криштиану Роналду 4 та инвестор билан биргаликда «Ал-Наср»ни сотиб олиш бўйича таклиф тайёрламоқда

Беш карра «Олтин тўп» соҳиби, португалиялик ҳужумчи Криштиану Роналду ўзи ҳозирда тўп сураётган Саудия Арабистонининг «Ал-Наср» футбол клуби хўжайинига айланиши мумкин.

DAZN Portugal нашри манбасининг хабар беришича, 41 ёшли футболчи бошқа 4 та инвестор билан биргаликда клубни сотиб олиш учун ариза тайёрламоқда. Келишувнинг ҳар бир иштирокчиси жамоани сотиб олиш учун камида 92 миллион евро сармоя киритиши назарда тутилган.

Роналду 2022 йилнинг декабридан буён «Ал-Наср»да ўйнаб келмоқда. Ўзининг профессионал фаолияти давомида у Лиссабоннинг «Спортинг», Англиянинг «Манчестер Юнайтед», Испаниянинг «Реал Мадрид» ва Италиянинг «Ювентус» клублари шарафини ҳам ҳимоя қилган.

Португалиялик футболчи фаолияти давомида 5 марта Чемпионлар лигасида ғолиб чиққан, 1 марта Европа чемпиони бўлган ва 2 марта Миллатлар лигасида зафар қучган. Бундан ташқари, у миллий терма жамоалар, Европа чемпионатлари, Чемпионлар лигаси ва Клублар ўртасидаги жаҳон чемпионати тарихидаги энг яхши тўпурар сифатида рекордни сақлаб турибди.