Роналду жорий мавсум охирида футболчилик фаолиятини якунлаши мумкинлигига ишора қилди

Роналду жорий мавсум якунида футболчилик фаолиятини тугатиши мумкинлигига ишора қилди.

"Ан-Насср" клуби ва Португалия терма жамоаси ҳужумчиси Криштиану Роналду жорий йил унинг профессионал футболчилик фаолиятидаги сўнггиси бўлиши мумкинлигини маълум қилди. 41 ёшли футболчи Вогуе журналида чоп этилган интервюсида ўзининг келажакдаги режалари ҳақида тўхталиб ўтди.

"Катта эҳтимол билан, бу менинг футболдаги сўнгги йилим бўлади ва мен ўзимдан ажойиб мерос қолдирмоқчиман", дейди Роналду.

Ҳужумчи фаолиятини якунлаганидан сўнг нималар билан шуғулланиши ҳақидаги саволга ҳам батафсил жавоб берди.

"Вақтимни кўпроқ ҳордиқ чиқаришга, саёҳат қилишга, ўзимга ёқадиган падел ўйинини томоша қилиш ва ўйнашга, шунингдек, эришган ютуқларимиздан завқланишга сарфламоқчиман. Нима бўлганда ҳам, бу 25 йиллик кўплаб қурбонликлар талаб қилган давр бўлди", деб қўшимча қилади португалиялик футболчи.

Беш карра "Олтин тўп" эгаси 20 йиллик фаолияти давомида жами 976 та гол урган. Ҳозирда у голлари сонини 1000 тага етказиш учун "Ан-Насср" сафида тўп сурмоқда.

Маълумот ўрнида, Роналду 2002-йилда "Спортинг" сафида дебют қилган. Шунингдек, у "Манчестер Юнайтед", "Реал Мадрид", "Ювентус" ва "Ан-Насср" клубларида тўп суриб, кўплаб йирик совринларни қўлга киритган. Фақатгина Португалия терма жамоаси билан Жаҳон Чемпионатида зафар қучиш футболчининг совринлари орасида амалга ошмай қолган ягона йирик ютуқ бўлиб турибди.