Крайслер-билдинг сотилганидан кейин унинг тожи сайқалланади
Манҳэттеннинг ўзига хос осмонўпар биноси капитал таъмирланади ва янги идоралар захирасини тақдим этади.
Крайслер-билдинг (Chrysler Building) сотилганидан кейин унинг тожи сайқалланадиган бўлди
Манҳэттен уфқидаги энг таниқли миноралардан бири бўлган Крайслер-билдинг кўп миллион долларлик олди-сотди шартномаси доирасида йирик таъмирлашдан ўтказилади.
Нью-Йоркда деярли 100 йил аввал очилган осмонўпар бинонинг Арт Деко услубидаги тожи сайқалланади ва қайта тикланади, шунингдек, таъмирлаш ишлари бинонинг 77 қаватли фасадини ҳам қамраб олади.
Tishman Speyer девелоперлик компанияси ижара ҳуқуқини Cooper Union хусусий коллежидан (Илм-фан ва санъатни ривожлантириш бўйича Купер Иттифоқи) қабул қилиб олди.
Tishman Speyer ва унинг ҳамкорлари лойиҳага 235 миллион доллар (178 миллион фунт стерлинг) сармоя киритади, бу маблағ эвазига улкан бургут гаргулиялари ва «ҳашаматли» дам олиш ҳудуди жойлашган 61-қават ҳам янгиланади.
Девелопер Гранд Сентрал (Grand Central) темир йўл вокзали яқинида жойлашган бинонинг катта қисмидан офис майдони сифатида фойдаланишни режалаштирмоқда. У компанияларга ўзларининг янги жойларига тезкорлик билан кўчиб ўтиш имконини берувчи, ўзи «тайёр қурилиш ёндашуви» деб таърифлаган усулни қўлламоқда.
Tishman Speyer ушбу ҳудуд «Манҳэттендаги энг паст бўш офис майдонлари кўрсаткичига эга» эканини таъкидлаб, шундай қўшимча қилди: «Бу маҳаллада ўнлаб йиллар давомида янги офис майдонларини қуриш деярли амалга оширилмаган».
Таъмирлаш ишлари ички ишларни ҳам қамраб олади, жумладан, бинонинг механик, лифт, электр ва ҳаво айланиш тизимлари янгиланади.
Баландлиги 1046 фут (319 метр) бўлган Крайслер-билдинг бир вақтлар дунёдаги энг баланд бино бўлган — токи бир йилдан камроқ вақт ўтгач, яқин атрофдаги Эмпайр-стейт-билдинг (Empire State Building) ундан ўзиб кетгунга қадар.
Автомобиль магнати Уолтер Крайслер томонидан молиялаштирилган осмонўпар бино қурилиши 1928 йилда бошланган ва икки йилдан кейин якунланган.
Архитектор Уильям Ван Ален бургут гаргулияларини 1929 йилги Крайслер автомобилининг капот безаклари асосида лойиҳалаштирган.
Битирувчилари қаторига ихтирочи Томас Эдисон ҳам кирадиган Cooper Union коллежи Крайслер-билдинг остидаги ерга 1902 йилдан бери эгалик қилади.
Бу ер унга 1859 йилда коллежга асос солган ишлаб чиқарувчи ва саноатчи Питер Купернинг фарзандлари томонидан васият қилиб қолдирилган.
Келишувга кўра, Tishman Speyer Cooper Union коллежига ер ижараси тўловларини амалга оширади, коллеж эса бу маблағларни «барча бакалавриат талабалари учун тўлиқ ўқиш стипендияларини қайта тиклаш бўйича жасоратли режани» молиялаштиришга йўналтирмоқчи.
Cooper Union президенти Стивен Маклафлин шундай деди: «Ушбу келишувнинг аҳамияти, пировардида, Cooper Union талабаларининг авлодлари учун қандай имкониятлар яратиши билан боғлиқдир».