Краматорскка 26 дақиқа ичида саккиз марта зарба берилди
Россия қўшинлари 13-август куни кечқурун Украинанинг Донецк вилоятидаги Краматорск шаҳри ва унга яқин Беленкое аҳоли пунктига кетма-кет зарбалар берди. Дастлабки маълумотларга кўра, ҳужум оқибатида бир киши ҳалок бўлган, яна 15 киши яраланган.
Краматорск 26 дақиқа ичида саккиз марта нишонга олинди.
Донецк вилояти ҳарбий маъмурияти раҳбари Вадим Филашкиннинг хабар беришича, 13-август куни кечки соат 20:30 дан 20:56 гача Краматорск ва Беленкое аҳоли пунктларига жами саккизта зарба берилган. Дастлабки маълумотларга кўра, ҳужумларда авиация бомбаларидан фойдаланилган.
Краматорскда зарбалардан бири турар жой ҳудудига тушиб, кўп қаватли уйга зарар етказган. Бошқа вайронагарчиликлар ҳақидаги маълумотлар аниқлаштирилмоқда.
Ахборот агентликлари ҳодиса жойидан видеоларни эълон қилди. Кадрларда тўққиз қаватли уйнинг бир қисми қулаб тушгани ва ёнғин бошлангани кўринади. Агентлик маълумотига кўра, вайроналар остида одамлар қолиб кетган бўлиши мумкин.
Ҳозирча ҳужум оқибатида бир киши ҳалок бўлгани ва 15 киши жароҳатлангани маълум қилинган.
Фронт чизиғига яқин жойлашган Краматорск сўнгги пайтларда мунтазам равишда ҳаво ҳужумларига учрамоқда.
31-июл куни эрталаб Россия қўшинлари шаҳарга тўртта авиация бомбаси ташлаган. Украина расмийларига кўра, ўша ҳужумда бир киши ҳалок бўлиб, 11 киши яраланган. Украина Давлат фавқулодда вазиятлар хизмати маълумотларига кўра, зарбалардан кейин келиб чиққан ёнғинларнинг умумий майдони 685 квадрат метрга етган.
Бундан бир кун аввал ҳам Краматорскка бешта авиация бомбаси билан зарба берилгани хабар қилинган эди. Бомбалардан бири кўп қаватли турар жой биносига тушиб, ёнғин келиб чиққан. Оқибатда олти киши жабрланган.
20-июлга ўтар кечаси эса Краматорскнинг турар жой мавзелари олти марта ўққа тутилган. Украина томони маълумотларига кўра, ўша ҳужумда ҳам бир киши ҳалок бўлган ва бир неча киши яраланган.