Ким Чен Иннинг синглиси АҚШ машғулотларига жавобан ядровий кучларни ошириш билан таҳдид қилди
Ким Чен Иннинг синглиси АҚШ машғулотларига жавобан ядровий кучларни ошириш билан таҳдид қилди
АҚШнинг ҳарбий машғулотлари Шимолий Кореяни ўз ядровий арсеналини кучайтиришга ундамоқда, деди Шимолий Корея раҳбари Ким Чен Иннинг синглиси, Меҳнат партияси Марказий қўмитаси бўлим бошлиғи Ким Ё Чжон.
АҚШ, Жанубий Корея ва Япония ўртасидаги Фреедом Эдге номли қўшма машғулотлар 7—11-сентябр кунлари Жежу оролининг шарқий ва жанубий қисмида, халқаро сувларда ўтказилди. Уч томонлама денгиз машқлари доирасида иттифоқчилар сувусти ва сувости кемаларига қарши операцияларни машқ қилди.
“Ташқи кучларнинг миллий хавфсизлигимизга тобора ортиб бораётган таҳдиди бизни ядровий салоҳиятимизни доимий ва тегишли равишда оширишга мажбур қилмоқда”, деди Ким Чен Иннинг синглиси.
Унинг айтишича, КХДРнинг мудофаа салоҳиятини мустаҳкамлаш жараёнида ҳеч қандай ўзгариш бўлмайди.
Фреедом Эдге машқларидан кейин Шимолий Корея АҚШни можаро қўзғашда айблаган эди. Пхенян Американинг “уруш ўйинлари”га жавобан янада қаттиқроқ чоралар кўриши мумкинлиги ҳақида огоҳлантирган.
Ким Ё Чжон, шунингдек, АҚШ бощилигидаги мунтазам ҳарбий машқлар Корея яриморолида ва минтақада вазият кескинлашувининг асосий омили эканини таъкидлади.
Аввалроқ Шимолий Корея артиллерия ва ракета қўшинлари иштирокида ҳарбий машғулот ўтказгани ҳақида хабар берилганди. Унда Шимолий Корея армиясининг барча даражадаги бўлинмалари қатнашган.
Айни пайтда Жанубий Корея разведкаси хабар беришича, Ким Чен Ин КХДР ҳарбийларининг Россия томонида Украинага қарши жанг қилиши эвазига олинган маблағларни қатор қурилиш ва қурол-яроғ лойиҳаларини молиялаштиришга йўналтирмоқда.
Сеул маълумотларига кўра, Пхенян сўнгги уч йил ичида Россиядан қурол етказиб бериш ҳамда КХДР ҳарбийларининг Курск вилоятини озод этишда қатнашиши эвазига пул ва турли иқтисодий имтиёзлар кўринишида камида 7,7 миллиард доллар олган. Тўловларнинг умумий миқдори 14 миллиард долларгача етиши мумкин.