Кембрижлик олим Испаниядаги поезд ҳалокатида вафот этди
Марта Шаҳбази «илҳомлантирувчи, иқтидорли ва фидойи олим» эди, дейди у ишлаган лаборатория.
Кембриж олими Испаниядаги поезд ҳалокатида вафот этди
Кембриж университетининг мукофотга сазовор бўлган тадқиқотчиси илмий муваффақиятлари учун бериладиган мукофотни олишга кетаётганда Испаниядаги темир йўл ҳалокатида ҳалок бўлди.
Икки фарзанднинг онаси Доктор Марта Шаҳбази чоршанба куни мукофотлаш маросимига кетаётган эди. У кетаётган поезд Мадриднинг жанубидаги Урда яқинида бошқа поезд билан тўқнашиб кетди, оқибатда 69 киши ҳалок бўлди.
У Кембриждаги MRC Молекуляр биология лабораториясида (LMB) тадқиқотчилар гуруҳига раҳбарлик қилган аффилиат ассистент-профессор эди ва инсон эмбрионлари ҳамда ҳужайра биологияси бўйича қилган ишлари учун бир қанча мукофотларга сазовор бўлган эди.
LMB ўз баёнотида уни "илҳомлантирувчи, иқтидорли ва ўз ишига фидойи олим" деб таърифлади ва унинг ўлими "чуқур шок ва катта йўқотиш" эканини айтди.
Ҳужайра биологияси бўйича мутахассис Кембриж Биомедицина кампусида жойлашган LMB'даги Шаҳбази лабораториясини бошқарган.
У инсоннинг илк ривожланишини ўрганишга қўшган ҳиссаси учун Испания Ривожланиш биологияси жамияти мукофоти ғолиби деб топилган эди ва мукофотни Андалусиядаги Эль-Ромпидода ўтказиладиган конференцияда қабул қилиб олиши керак эди.
LMB шундай деди: "Икки ёш боланинг рафиқаси ва онаси бўлган Марта оила ва карьерасини мувозанатда сақлаш ҳақида таъсирли ёзган бўлиб, ўзини таърифлаш учун ишлатган 'она олим' ибораси билан кўпчиликнинг ҳавасини келтирган намунавий шахс эди.
Марта илҳомлантирувчи, иқтидорли ва фидойи олим эди, унинг тадқиқотлари инсон эмбрионлари ривожланишининг энг илк босқичларига ва ҳомиладорликнинг муваффақиятсиз якунланишига олиб келадиган хатоликлар қандай юз беришига ойдинлик киритди", деди LMB.
Институт унинг ўлими "LMB учун чуқур шок ва катта йўқотиш" эканини билдирди.
Лабораториянинг қўшимча қилишича, унинг меҳнати "кўплаб мукофотлар ва совринлар" билан эътироф этилган.
Шаҳбази Кембриж лабораториясига 2020 йилда келиб қўшилган эди
Шаҳбази Кембриж университети веб-сайтида унинг Ўзак ҳужайралари институтида (CSCI) етакчи тадқиқотчи сифатида кўрсатилган.
Институт директори профессор Берти Готтгенс жамоа унинг ўлимидан "шокда ва чуқур қайғуда" эканини айтди.
"Марта CSCI'даги аффилиат етакчи тадқиқотчи ва аффилиат ассистент-профессор лавозимлари билан бир қаторда MRC Молекуляр биология лабораториясида (LMB) ўз асосий тадқиқот гуруҳига раҳбарлик қилган", деди у.
"Ҳар иккала институтда ҳам у инсоннинг илк ривожланиши бўйича кашфиётчи тадқиқотлари учун юқори ҳурматга сазовор бўлган ва ҳамкорлик руҳи учун қадрланган.
Унинг ижодкорлиги, иштиёқи ва саховати жуда соғинилади."
Унинг ўлими ҳақидаги хабар биринчи бўлиб Шаҳбазининг холаси ишлайдиган Сантьяго-де-Компостеладаги CiMUS томонидан ижтимоий тармоқдаги пост орқали тасдиқланди.
Шаҳбази Кембриж университетига пост-докторант сифатида, кейинчалик 2020 йилда LMB'га қўшилишдан олдин Испания Миллий саратон тадқиқотлари марказида докторлик (PhD) ишини тамомлаган эди.
Испаниядаги ҳалокат давлат томонидан бошқариладиган Renfe юқори тезликдаги поезди Iryo компанияси томонидан бошқариладиган тўхтаб турган поезднинг орқа қисмига бориб урилиши оқибатида юз берди.
Бу Европанинг замонавий тарихидаги энг ёмон темир йўл офатларидан бири ва Испанияда 2013 йилдан бери юз берган энг мудҳиш ҳалокатдир.
Мамлакатда уч кунлик миллий мотам эълон қилинди.
Иккала поездда умумий ҳисобда 540 дан ортиқ одам бўлган.