Канье Уэстнинг Россиядаги концертлари бир неча ҳафталик мавҳумликдан кейин расман бекор қилинди
Стадион рэпернинг концертига мезбонлик қилишга розилик бермаганини маълум қилганидан бери Санкт-Петербург шоулари атрофида тартибсизликлар юзага келди.
Канье Уэстнинг Россиядаги концертлари бир неча ҳафталик ноаниқликдан кейин расман бекор қилинди
Санкт-Петербургнинг «Газпром Арена» стадиони август ойида Йени қабул қилмаслигини маълум қилган эди
Йенинг Россиядаги иккита концерти расман бекор қилинди, буни ташкилотчилар тасдиқлашди.
Илгари Канье Уэст номи билан танилган рэпер 10 ва 11 октябрь кунлари Санкт-Петербургдаги «Газпром Арена»да чиқиш қилиши керак эди.
Бироқ, концерт майдончаси Россия 2022 йилда Украинага бостириб кирганидан бери ғарблик санъаткорнинг энг йирик чиқиши бўлиши кутилаётган ушбу тадбирни қабул қилмаслигини айтганидан кейин, шоулар олдидан тушунмовчиликлар юзага келди.
Telegram мессенжеридаги постда концерт ташкилотчиси бўлган «Say Agency» агентлиги концертлар бекор қилинганини «самимий афсус» билан тасдиқлади.
«Йенинг Санкт-Петербургдаги концертлари белгиланган саналарда бўлиб ўтолмайди», деб ёзди Москвада жойлашган агентлик.
«Яқин келажакда лойиҳанинг ҳолати ва режаларимиз бўйича расмий баёнот берамиз».
Йе шу йил бошида гастрол сафарларига қайтди ва шундан бери АҚШ стадионларида бир қатор концертлар берди
«Газпром Арена» август ойида концерт промоутерлари билан ижара шартномаси имзоламаганини, бу эса ушбу майдонда концерт ўтказиб бўлмаслигини англатишини маълум қилган эди.
«Say Agency» аввалроқ стадион билан боғлиқ муаммони ҳал қилиш устида ишлаётганини айтган, кейинроқ эса шоулар ўтказилмаслигини тасдиқлаган эди.
Стадион маъмурияти, шунингдек, Йенинг чиқиши бўйича шикоятлар олганини ҳам билдирган.
У яқинда ўтмишда бир неча бор антисемитик ва нацистпарастлик руҳидаги баёнотлар бергани учун узр сўраб, биполяр бузилиш туфайли «воқелик билан алоқани йўқотганини» айтган эди.
Иккинчи жаҳон урушида Россия нацистлар томонидан босиб олинган ва мамлакат Ташқи ишлар вазирлиги матбуот котиби режалаштирилган шоуларни танқид қилганлар қаторида бўлди.
Мария Захарова бу концертларни қабул қилиб бўлмас деб атади ва Йенинг Гитлерни «улуғлаганига» эътибор қаратди.
2025 йилда Йе свастика тасвирланган футболкаларни сотишни бошлади ва «Heil Hitler» деб номланган қўшиқни чиқарди.
Россиядаги уруш тарафдори бўлган блогерлар ҳам АҚШ Украинага молиявий ва ҳарбий ёрдам кўрсатаётган бир пайтда, мамлакат америкалик санъаткорни қабул қилиши керакми ёки йўқми, деган масалани шубҳа остига олишди.
Йе ҳозирча бекор қилиниш бўйича оммавий равишда изоҳ бермади.
Унинг АҚШда беш йилдан ортиқ вақт ичидаги илк йирик концерти апрель ойида Лос-Анжелесда бўлиб ўтди ва шундан бери у Испания, Португалия ва Нидерландия каби мамлакатларда чиқиш қилди.
Бироқ, унинг Россиядаги шоулари бекор қилинган ягона концертлар эмас.
Ўтган ёзда Йе Лондоннинг «Wireless» фестивалида бош ижрочи бўлиши керак эди, бироқ унга Буюк Британияга кириш тақиқланди, бу эса ташкилотчиларни бутун тадбирни бекор қилишга мажбур этди.
Йенинг шоулари Польша, Италия ва Францияда ҳам бекор қилинган эди.