Каналик турист Лас-Вегасадаги вольердан фламингони ўғирлаганидан кейин ҳайвонларга шафқатсиз муносабатда бўлишда айбдор деб топилди
Эркак киши 30-40 банка пиво ичганидан сўнг Пинчини «Фламинго» меҳмонхонаси ва казиносидаги кафасидан тортиб олганини, лекин ҳеч қандай ёмонликни мақсад қилмаганини айтиб кўргазма берди.
Каналик турист Лас-Вегасдаги қўрадан фламингони олиб чиққанидан кейин ҳайвонларга шафқатсиз муомала қилишда айбдор деб топилди
Фэйрбарн лифтда фламинго билан меҳмонхонадаги хонасига чиқаётгани кузатув камерасига тушиб қолган
Каналик эркак спиртли ичимлик таъсирида Лас-Вегасдаги қўрадан фламингони чиқариб олиб, меҳмонхонадаги хонасига олиб кирганидан сўнг ҳайвонларга шафқатсиз муомала қилишда айбдор деб топилди.
АҚШ шаҳрига ташриф буюрган Митчелл Фэйрбарн март ойида «Flamingo Las Vegas Hotel and Casino»дан Пичи лақабли Чили фламингосини олиб кетган.
Унинг судида кўрсатилган видеоларда жилмайиб турган Фэйрбарн қушни бўйнидан ушлаганча хонасига лифтда чиқаётгани акс этган. У кўргазма беришича, ҳодисадан олдин 30 тадан 40 тагача пиво ичган ва ҳайвонга ҳеч қачон зарар етказмоқчи бўлмаганини айтган. У беш йилга яқин қамоқ жазосига тортилиши мумкин.
Ҳайвонлар бўйича экспертлар Фэйрбарннинг хатти-ҳаракатлари сабабли фламингонинг патлари жунжиккани ва қон йўқотгани ҳақида кўргазма беришди.
Фэйрбарннинг адвокати унинг хатти-ҳаракатлари зарарсиз ҳазил сифатида мўлжалланганини айтди ва унинг «ёмон қарорлари»да алкоголни айблади.
«У бундай қилмаслиги, яшаш муҳитига кирмаслиги, қушга тегмаслиги, Пичини ичкарига олиб кирмаслиги керак эди», деди унинг адвокати Жош Томшек.
«Ҳақиқат шундаки, Мич мас эди. Мич аҳмоқлик қилди. У ёмон қарорлар қабул қилди».
Адвокатининг қўшимча қилишича, у ҳибсга олинганидан бери ўлим билан таҳдидлар олган.
Ўз ҳимоясида кўргазма берган 34 ёшли Фэйрбарн қушни олиш «қизиқарли» бўлади деб ўйлаганини айтди.
Унинг айтишича, у тун бўйи ичиб чиққан ва қушни ўғирлашга қарор қилганида ҳамкасби билан телефонда гаплашиб бўлган эди.
Машҳур Лас-Вегас Стрип кўчасида жойлашган «Flamingo Las Vegas» меҳмонхонаси ва казиноси ичида бепул айланиш мумкин бўлган жанубий табиат ҳудуди мавжуд. У ерда Чили фламинголари тўдаси, бошқа қушлар, балиқлар ва ташбақалар бор.
BBCнинг АҚШдаги ҳамкори CBS хабарига кўра, суд жараёнида ҳакамлар ҳайъати 14 нафар гувоҳнинг кўргазмасини эшитди ва 112 тадан ортиқ далилни кўриб чиқди.
Ҳакамлар ҳайъатига уни ҳайвонларга шафқатсиз муомала қилиш бўйича жиноий ва ҳуқуқбузарлик айбловлари бўйича айбдор деб топиш учун тахминан беш соат вақт кетди.
Фэйрбарн ҳибсга олинганидан бери АҚШни тарк эта олмаяпти. У Лас-Вегасда уй қамоғида қолмоқда, ҳукм чиқариш мажлиси декабрь ойида бўлиб ўтиши керак.
Штат ветеринарининг айтишича, Пичи ҳодисадан бери асосан тузалиб кетган, аммо энди одамлар атрофида ўзини кўпроқ ташвишли тутади.