АҚШда эрига тарсаки туширган арманистонлик аёл депортация қилинди
АҚШда эрига тарсаки туширган арманистонлик аёл депортация қилинди
Арманистонлик 28 ёшли турист Арпине Мисакян АҚШнинг Лас Вегас шаҳридаги ресторанда турмуш ўртоғи билан жанжаллашиб қолгани учун қўлга олинди. Прокуратура унга нисбатан оилавий зўравонлик бўйича иш очишдан бош тортган бўлса-да, у қарийб уч ой давомида иммиграция ҳибсхонасида сақланиб, кейинроқ АҚШдан депортация қилинди.
Маълумотларга кўра, воқеа 6-апрел куни Энсоре Лас Вегас меҳмонхонасида юз берган. Мисакян ва унинг оиласи Жанубий Калифорниядан келган бўлиб, улар Беллагио меҳмонхонасида жойлашган ва кечки овқат учун Тҳе Буффет ат Вйнн ресторанига борган.
Полиция хабарига кўра, телефон устида келиб чиққан тортишув пайтида Мисакян эрининг юзига шапалоқ туширган. Бу ҳолат меҳмонхонадаги кузатув камераларига ёзилиб қолган. Меҳмонхона ходимлари полицияни чақирган ва аёл оилавий зўравонликда гумон қилиниб ушланган.
Воқеа жойида Мисакяннинг қон босими кўтарилиб, нафас олиши қийинлашган. Шу сабабли у замбилда меҳмонхонадан олиб чиқилиб, шифохонага олиб кетилган. Кейинчалик уни АҚШ Иммиграция ва божхона хизмати (ИСЕ) ходимлари ҳибсга олган.
Аёлнинг турмуш ўртоғи Карен Арутюнян бу оддий оилавий келишмовчилик эканини айтиб, хотинини озод қилишни сўраган. Бироқ полиция Невада штати қонунларига таянган ҳолда бундай айблов билан уни ҳибсда ушлаб туриш ваколатига эга эканини билдирган.
Кейинроқ Кларк округи прокуратураси оилавий зўравонлик бўйича айблов қўйишдан воз кечган. Шунга қарамай, Мисакян ИСЕ ҳибсхонасида қолган. ОАВ хабарларига кўра, ўша вақтда унинг АҚШдан бошпана сўраб берган аризаси ҳали кўриб чиқилаётган эди.
Аёл аввал Ҳендерсон шаҳридаги ҳибсхонада ушланган, сўнг Аделантодаги иммиграция марказига кўчирилган. ИСЕ вакиллари Мисакян ўз хоҳиши билан мамлакатни тарк этишга рози бўлганини маълум қилган. У қўлга олинганидан деярли уч ой ўтиб, 4-июл куни Арманистонга депортация қилинган.