Жимми Киммел Демократлар вакили билан интервью телеэфирга узатилмаслигини айтди ва бунга регуляторнинг «таҳдидлари»ни сабаб қилиб кўрсатди
Оқ уй Киммелнинг Жеймс Таларико билан суҳбатига доир иддаоларини рад этиб, телебошловчини «роль ўйнаш»да айблади.
Жимми Киммел Демократлар партияси вакили билан суҳбат регуляторнинг «таҳдидлари» туфайли телевизорда кўрсатилмаслигини айтди
Телебошловчи Жимми Киммел Демократик партиядан Сенатга номзод Жеймс Таларико билан уюштирган интервьюси Федерал алоқа комиссияси (FCC) томонидан бўлган босим туфайли телевидение орқали намойиш этилмаслигини маълум қилди.
Чоршанба куни ўзининг «Jimmy Kimmel Live!» ток-шоусида чиқиш қилган Киммел, Дональд Трамп президентлиги давридаги FCC унга ва унинг шоусига «оддий анъанавий таҳририят қарорлари, уларга ёқмаган меҳмонларни таклиф қилиш асосида» таҳдид қилганини айтди.
Оқ уй матбуот котиби FCC раҳбари Киммелга Таларико ёки бошқа бирор номзод билан интервьюси туфайли таҳдид қилганини инкор этди.
Трамп томонидан қўллаб-қувватланаётган республикачи Кен Пэкстон ноябрь ойида бўлиб ўтадиган оралиқ сайловларда Таларико билан куч синашади.
Техасдаги ушбу кураш натижаси Демократлар Дональд Трамп президентлигининг сўнгги икки йилида АҚШ Сенати устидан назоратни қайтариб ола билиш-билмаслигини ҳал қилишга ёрдам беради.
Чоршанба кунги кўрсатувда Киммел йиллар давомида кўплаб сиёсий номзодлардан, жумладан, Трампнинг ўзи биринчи муддатга номзодини қўйган пайтда ҳам интервью олганини айтди.
«Энди у президент бўлганидан кейин, унинг FCC идораси оддий, анъанавий таҳририят қарорлари, уларга ёқмаган меҳмонларни таклиф қилиш асосида менга таҳдид қилди, шоуимизга таҳдид қилди, тармоғимиз ABC, филиалларимиз ва маҳаллий станцияларимизга таҳдид қилди», деди Киммел.
У телеканалнинг маҳаллий станциялари, айниқса Техасдаги ABC филиалларини ҳисобга олган ҳолда, Таларико билан интервьюси пайшанба куни телевидение орқали эфирга узатилмаслигини ва бунинг ўрнига YouTube'га жойлаштирилишини қўшимча қилди.
Оқ уй матбуот котиби Дэвис Ингл BBC'га берган баёнотида шундай деди: «Жимми Киммел — кўпинча қилганидек — ушбу маъмурият сиёсати ҳақида сохта тасаввур яратиш учун рол ўйнамоқда».
«[FCC] раиси [Брендан] Карр Жеймс Таларико ёки бошқа бирор номзоддан интервью олиш борасида унга таҳдид қилгани йўқ», дея қўшимча қилди Ингл.
FCC кўрсатувлар учун лицензиялар беради, шунингдек, радио, ТВ ва сунъий йўлдош эфирларини тартибга солади.
«Jimmy Kimmel Live!» шоусини эфирга узатувчи ABC телеканали бир неча ойдан бери регулятор ва Трамп томонидан тайинланган Карр билан низолашиб келмоқда.
Сентябрь ойида Киммел консерватив фаол Чарли Киркнинг отиб кетилиши ҳақида айтган гаплари туфайли қисқа муддатга эфирдан четлаштирилган эди. Бу қадам Трамп томонидан тайинланган Карр ABC ва унинг бош компанияси Disney'га қарши чора кўриш билан таҳдид қилганидан бир неча соат ўтиб содир бўлди.
Кейинроқ, апрель ойида Трамп ва биринчи хоним Мелания Трамп ABC телеканалини Киммелнинг у ҳақида қилган ҳазили учун жазолашга чақиришди.
Кўп ўтмай, ФСС Дисней'нинг телекўрсатувлар лицензияларини муддатидан олдин қайта кўриб чиқишни буюрди. Бунга жавобан ABC ўтган ой FCC устидан даъво аризаси билан судга мурожаат қилиб, ўз таҳририят мазмуни туфайли адолатсиз равишда нишонга олинаётганини билдирди.
Трамп баъзида унинг президентлигини танқид қилган бир нечта АҚШ телеканалларининг FCC лицензиясини бекор қилишни кўриб чиқаётганини айтган.
Февраль ойида АҚШнинг яна бир тунги шоу бошловчиси Стивен Кольбер ўзи ишлайдиган CBS телеканалини FCC томонидан бўладиган қасосдан қўрқиб, Таларико билан интервьюсини эфирга узатишдан бош тортганликда айблади. CBS интервью эфирга узатилишини тўсиб қўйганини инкор этиб, фақат «ҳуқуқий тавсиялар» берганини маълум қилди.