Жигар ва гречкасиз ҳам ферритин миқдорини оширишга ёрдам берадиган 5 та ширинлик
Кечқурун чой билан икки-уч бўлак қора шоколад истеъмол қилиш стрессни камайтиришга ва темир захирасини тўлдиришга ёрдам бериши мумкин.
**Жигар ва гречкасиз ҳам ферритин миқдорини оширишга ёрдам берадиган 5 та ширинлик**
Ферритин миқдорининг пастлиги ҳозирда кўплаб аёлларда учрайдиган муаммолардан бири ҳисобланади. Бу ҳолат нафақат ташқи кўринишга, балки умумий саломатлик ва кайфиятга ҳам таъсир қилади.
Ферритин миқдорини кўтариш ва уни меъёрда ушлаб туриш учун фақат дори воситалари ёки томир орқали юбориладиган препаратларга таяниш шарт эмас. Кундалик овқатланишга темирга бой айрим маҳсулотларни қўшиш ҳам фойда бериши мумкин.
Одатда шифокорлар гречка ва жигар истеъмол қилишни тавсия этади. Ширинликлар эса кўпинча темирнинг душмани сифатида қаралади. Бироқ темир захирасини тўлдиришга ёрдам бериши мумкин бўлган ширин маҳсулотлар ҳам мавжуд.
**Тахини пастаси билан хурмо**
Хурмо таркибида гемли темир ва табиий глюкоза бор. У организмни энергия билан таъминлайди. Кунжутдан тайёрланадиган тахини пастаси эса калсий ва мисга бой. Мис темир алмашинувида муҳим рол ўйнайди. Муаллифларнинг тавсиясига кўра, кунига икки дона хурмони бир қошиқ тахини билан истеъмол қилиш мумкин.
**Какао миқдори 85 фоиз бўлган шоколад**
Темирнинг организмга ёмон сўрилишига сабаб бўладиган омиллардан бири стресс ҳисобланади. Какао таркибида эса темир ва магний мавжуд. Шоколаддаги какао миқдори қанча юқори бўлса, унда темир шунча кўп, шакар эса камроқ бўлади. Кечқурун чой билан икки-уч бўлак қора шоколад истеъмол қилиш стрессни камайтиришга ва темир захирасини тўлдиришга ёрдам бериши мумкин.
**Шакарсиз олма қоқиси**
Олма таркибидаги С витамини бошқа маҳсулотлардан темирнинг ўзлаштирилишини яхшилайди. Шакарсиз тайёрланган табиий олма қоқиси тушлик ёки кечки овқатда истеъмол қилинган темирнинг организмга яхшироқ сингишига ёрдам бериши мумкин. Уни бир ҳовуч ёнғоқ билан истеъмол қилиш ҳам мумкин.
**Кунжут ҳолваси**
Кунжут темир ва мисга бой ўсимлик маҳсулотларидан бири ҳисобланади. Шу сабабли таркиби сифатли ва ортиқча қўшимчаларсиз тайёрланган кунжут ҳолваси ушбу фойдали моддаларнинг манбаи бўлиши мумкин. Мақолада таъкидланишича, ҳолванинг кичик бир бўлаги ҳам организмнинг мисга бўлган кунлик эҳтиёжини қондиришга ёрдам беради.
**Занжабил қоқиси**
Занжабил организмдаги яллиғланиш жараёнларини камайтиришга ёрдам бериши мумкин. У қондаги ферритин миқдори юқори бўлишига сабаб бўладиган яллиғланиш жараёнларига ҳам ижобий таъсир кўрсатади. Шунингдек, занжабил бошқа маҳсулотлар таркибидаги темирнинг ўзлаштирилишига ёрдам бериши айтилади. Шу боис унинг қанд қўшиб тайёрланган қоқисини оз миқдорда истеъмол қилиш тавсия этилади.