Жавоҳир Синдаров ФИДЕ талқинига кўра энг яхши шахматчи деб топилди
Ўзбекистонлик гроссмейстер Жавоҳир Синдаров «Энг яхши эркак шахматчи» номинациясида илк FIDE Excellence Awards мукофоти ғолиби бўлди. Икки йил ичида у Жаҳон кубоги ва Номзодлар турнирида ғолиб чиқди, рейтингнинг топ-4 талигига кирди, Самарқандда эса Ўзбекистон терма жамоаси таркибида олимпия чемпионига айланди.
Жавоҳир Синдаров ФИДЕ талқинига кўра энг яхши шахматчи деб топилди
Ўзбекистонлик гроссмейстер Жавоҳир Синдаров Халқаро шахмат федерациясининг биринчи FIDE Excellence Awards 2026 мукофоти лауреати бўлди. У Best Chess Player — Male («Эркаклар ўртасида энг яхши шахматчи») номинациясида ғолиб чиқди. Мукофот унга 27 сентябрь куни Самарқандда бўлиб ўтган 46-Бутунжаҳон шахмат олимпиадасининг ёпилиш маросимида топширилди.
Ушбу мукофот шахматчиларнинг икки йиллик олимпия циклидаги — 2024 йил сентябридан 2026 йил августигача бўлган муваффақиятларини эътироф этади. ФИДЕ Excellence Awards мукофотини жорий йилда таъсис этди ва у ҳар икки йилда бир марта топширилади.
Синдаровнинг халқаро турнирлардаги иштироки, мусобақаларга тайёргарлиги ва мураббийлар билан ишлаши Ўзбекистон Миллий банки кўмагида амалга оширилмоқда.
«Эркаклар ўртасида энг яхши шахматчи» номинациясининг шорт-листига ўнта гроссмейстер киритилди. Синдаровдан ташқари, мукофотга Ўзбекистоннинг яна бир вакили Нодирбек Абдусатторов, Магнус Карлсен (Норвегия), Фабиано Каруана (АҚШ), Аржун Эригайси (Ҳиндистон), Алиреза Фирузджа (Франция), Аниш Гири (Нидерландия), Гукеш Доммараджу (Ҳиндистон), Винсент Каймер (Германия) ва Рамешбабу Прагнанандха (Ҳиндистон) даъвогарлик қилишди.
Номзодларни кўрсатишнинг очиқ босқичидан сўнг, ФИДЕ махсус ҳакамлар ҳайъати ҳар бир тоифа бўйича ўнта даъвогардан иборат шорт-листларни шакллантирди. Кейин ғолибларни FIDE Excellence Awards экспертлар панели аниқлади. Мукофот жами 11 та номинацияни ўз ичига олади.
Кўриб чиқилаётган икки йиллик даврда Синдаров фаолиятидаги энг йирик муваффақиятларга эришди. 2025 йилда у ФИДЕ Жаҳон кубогини қўлга киритиб, ушбу турнир тарихидаги энг ёш чемпионга айланди. Финалда у Хитой вакили Вэй Ини мағлуб этиб, Номзодлар турнирига йўлланма олди.
2026 йил апрель ойида ўзбекистонлик гроссмейстер муддатидан олдин Номзодлар турнирида ғолиб чиқди ва жаҳон чемпиони унвони учун баҳсда Гукеш Доммараджу билан ўйнаш ҳуқуқини қўлга киритди. Ушбу даврда у рейтинг очколарини тахминан 100 бандга ошириб, жаҳон рейтингининг топ-4 талигига кирди.
Июль ойида, ФИДЕ мукофотнинг шорт-листларини эълон қилганида, Синдаров бир йўла иккита — «Энг яхши шахматчи» ва «Йил кашфиёти» номинацияларига номзод бўлган эди. Иккинчи номинацияда туркиялик шахматчи Ягыз Каан Эрдогмуш ғолиб чиқди.
Синдаров ФИДЕ мукофотини Ўзбекистон эркаклар терма жамоаси чемпион бўлган уй Олимпиадаси якунида қабул қилиб олди. Жамоа 11 та ўйинда 10 та ғалабага эришиб, 20 очко жамғарди ва Ченнай-2022 дан кейин иккинчи бор олимпия олтинларини қўлга киритди.
Синдаровнинг ўзи 10 та партияда 7 очко жамғарди — бешта ғалаба, тўртта дуранг ва битта мағлубият — ҳамда 2797 перформанс билан иккинчи тахтада бронза индивидуал медалига сазовор бўлди.
FIDE Excellence Awards 2026 мукофотининг Best Chess Player — Female («Аёллар ўртасида энг яхши шахматчи») номинациясида Ҳиндистон вакиласи Дивья Дешмукх ғолиб бўлди. Энг яхши аёл шахматчи унвони учун шорт-листдан Бибисара Асаубаева, Александра Горячкина, Хампи Конеру, Лэй Тинцзе, Анна Музычук, Тань Чжунъи, Вайшали Рамешбабу, Цзюй Вэньцзюнь ва Чжу Цзиньэр ҳам жой олган эди.