Жанубий Кореяда Ўзбекистоннинг тўрт фуқароси ушланди

**Жанубий Кореяда Ўзбекистоннинг тўрт фуқароси қўлга олинди**

Жанубий Кореяда Ўзбекистоннинг тўрт нафар фуқароси Сурияда фаолият юритаётган «Катиба ат-Таухид вал-Жиҳод» (КТД) террорчилик гуруҳини молиялаштириш ва унга ёрдам беришда гумон қилиниб ушланди. Бу ҳақда Ёнҳап агентлиги Кванджу полициясига таяниб хабар берди.

Тергов маълумотларига кўра, гумонланувчилардан бири — 30 ёшлар атрофидаги эркак — 2025 йил апрел ойидан бошлаб гуруҳга 6,3 миллион вон миқдорида криптовалюта юборган. Бу тахминан 4,6 минг долларга тенг. КТД 2022 йилдан бери БМТ Хавфсизлик Кенгашининг санксиялар рўйхатида туради.

Терговчилар, шунингдек, айни шу даврда эркак гуруҳдан криптовалюта олган бўлиши мумкин, деб гумон қилмоқда. Полиция тахминига кўра, у бу маблағларга умумий қиймати 170 миллион вон бўлган 11 та ишлатилган автомобил ва иккита экскаватор харид қилган. Кейин бу техника Сурияга жўнатилган.

Тергов маълумотларига кўра, гумонланувчининг КТД билан расмий алоқалари бўлмаган. Бироқ полиция унинг гуруҳ аъзоси бўлган укаси у билан боғланганидан кейин КТДга ёрдам бера бошлаганини аниқлаган.

Эркак Интерполнинг «қизил билдиришнома»сига киритилгач, апрел ойида қўлга олинган. Ёнҳап маълумотига кўра, у ишлатилган автомобилларни экспорт қилиш билан шуғулланувчи компанияга раҳбарлик қилган.

Ўзбекистоннинг яна уч нафар фуқароси ишнинг асосий фигурантига кўмаклашишда гумон қилинмоқда. Хусусан, тергов улар унга ишлатилган автомобилларни топишда ёрдам берган, деган хулосага келмоқда.

Полицияда сўроқ қилингач, уч гумонланувчига қамоққа олиш билан боғлиқ бўлмаган эҳтиёт чоралари қўлланган.

Иш ҳолатлари юзасидан тергов давом этмоқда.