Жаҳон иқтисодиётига янги таҳдид: Ямандаги ҳусийчилар Боб-ал-Мандабни тўсиб қўймоқчи
Трамп ҳусийчиларга зарба беришни рад этган.
Жаҳон иқтисодиётига янги хавф: Ямандаги ҳусийчилар Боб-ал-Мандабни тўсиб қўймоқчи
Якунланаётган ҳафтанинг иккинчи ярмида жаҳон ахборот агентликлари Ямандаги қонуний ҳукуматга таянган мухолифатдаги ҳусийчилар Боб-ал-Мандаб бўғозидан 80 километр узоқликдаги Моҳа шаҳрини эгаллагани ҳақида хабар берди.
Гувоҳларнинг айтишича, Эрон томонидан қўллаб-қувватланадиган ҳусийчилар отрядлари шаҳарга кириб, «Америкага ўлим, Исроилга ўлим!» дея ҳайқиришган.
АФП агентлиги маълумотига кўра, ҳафта бошидан бери давом этаётган тўқнашувларда 500 дан ортиқ киши ҳалок бўлган, ўн минглаб одамлар уйларини тарк этган.
Ҳусийчиларнинг олдинга силжиши Саудия Арабистони ҳудудига йўналтирилган зарбалар билан бирга кечмоқда. Саудия коалицияси маълумотига кўра, исёнчилар баллистик ракеталар ва дронлар ёрдамида Абҳа, Ҳамис-Мушайт ва Жизан шаҳарларига ҳужум қилган. Ар-Риёд ҳам бунга ёпирилма ҳаво зарбалари билан жавоб қайтарган.
Ҳафта охирига келиб ҳусийчилар Перим оролига етиб боргани ҳақида ҳам хабар тарқалди. Бу орол Осиё ва Европани боғловчи савдо йўлининг жанубий дарвозаси ҳисобланган Боб-ал-Мандаб бўғозини иккига ажратиб туради.
Бундан аввал Ямандаги Саудия томонидан қўллаб-қувватланадиган қонуний ҳукумат манбалари ҳукумат кучлари Перим оролини тарк этгани, ҳусийчилар эса Қизил денгиз соҳилидаги Зураб шаҳрини эгаллагани ҳақида хабар берган эди. Ушбу шаҳар орол рўпарасида жойлашган.
Ҳозирча ҳусийчиларнинг ўзи Перим оролини эгаллаб олгани ҳақида расман эълон қилмаган.
Ҳусийчилар қуролли кучлари вакили Яҳё Сариа ўз телеграм-каналида гуруҳ тез орада «жиддий оқибатларга олиб келадиган кенг кўламли ҳарбий операция» эълон қилишини ёзган.
Ҳозирги кескинлашув 2022-йилдан бери Ямандаги фуқаролик урушини тўхтатиб турган мўрт битимни бутунлай йўққа чиқариши мумкин. Ушбу мамлакатдаги ҳарбий тўқнашувлар 2014-йилда ҳусийчилар пойтахт Санони эгаллаб олганидан кейин бошланган, 2015-йил мартида эса Саудия Арабистони бощилигидаги араб коалицияси ҳам можарога тортилган.
Бугунги кунда ҳусийчилар мамлакатдаги энг йирик ҳарбий куч ҳисобланади ва Яман аҳолисининг тахминан 50-60 фоизи яшайдиган ҳудудларни ўз назоратига олган.