IT Park Uzbekistan ёшларни иш билан таъминлаш имкониятларини кенгайтирмоқда

IT Park Uzbekistan ёшларни иш билан таъминлаш имкониятларини кенгайтирмоқда

IT Park Uzbekistan маҳаллий ва халқаро компаниялар учун ягона номзодлар базасини яратган ҳолда, бутун мамлакат бўйлаб мутахассислар, талабалар ва битирувчилар учун ишга жойлашиш имкониятларини кенгайтирмоқда.

Рўйхатдан ўтган иш изловчиларнинг резюмелари, мос бўш иш ўринлари мавжуд бўлганда ва мутахассисларга сўров тушганда, компанияларга, шу жумладан IT Park Uzbekistan резидентларига тақдим этилиши мумкин.

Базада номзодларнинг касбий тажрибаси, ихтисослиги, чет тилларини билиши ва афзал кўрган бандлик шакли ҳисобга олинади. Ташаббус Ўзбекистоннинг барча ҳудудларини қамраб олади ва иш берувчиларга нафақат Тошкентдан, балки бошқа ҳудудлардан ҳам мутахассисларни кўриб чиқиш имкониятини беради.

Компанияларнинг талаби нафақат анъанавий IT-касбларга тегишли. Талаб юқори бўлган мутахассислар қаторида дастурчилар, QA-муҳандислар, маълумотлар билан ишловчи мутахассислар ва дизайнерлар, шунингдек, маркетинг, сотув, мижозларга хизмат кўрсатиш, молия, бухгалтерия ҳисоби ва маъмурий бошқарув соҳалари ходимлари бор.

BPO ва call-марказлар учун кадрлар танлаш алоҳида йўналиш бўлиб қолмоқда. Халқаро бозорлар ва хорижий мижозлар билан ишловчи компаниялар ҳам чет тилларини биладиган мутахассисларга қизиқиш билдирмоқда. Хусусан, инглиз, рус, немис, француз, испан, турк, араб, хитой, япон ва корейс тилларини биладиган номзодларга талаб катта.

Иш берувчининг талабларига қараб, иш изловчиларга офисдан, гибрид ёки масофавий иш шакли таклиф қилиниши мумкин. Бу ҳудудлардаги мутахассисларнинг имкониятларини кенгайтиради ва компанияларга Тошкентдан ташқарида ҳам ходимларни излаш имконини беради.

Базани шакллантириш воситаларидан бири Talent Park лойиҳасидир. Иш изловчилар ихтисослаштирилган бот орқали резюме юборишлари ҳамда ўз тажрибаси, кўникмалари ва касбий йўналиши ҳақидаги маълумотларни кўрсатишлари мумкин. Мос бўш иш ўринлари пайдо бўлганда, номзоднинг профили йирик маҳаллий ва халқаро компанияларга, жумладан IT Park Uzbekistan резидентларига кўриб чиқиш учун тақдим этилиши мумкин.

Кариера имкониятлари ва очиқ бўш иш ўринлари тўғрисидаги долзарб маълумотлар лойиҳанинг Telegram-каналида ҳам эълон қилиб борилади.

Базада рўйхатдан ўтиш автоматик тарзда ишга жойлашишни англатмайди ва бўш иш ўрнини кафолатламайди. Шу билан бирга, бу мутахассисларга ўз касбий профилини потенциал иш берувчиларга тақдим этиш ва кейинги номзодлар танловида иштирок этиш учун қўшимча имконият беради.