Исроил Ливанда уч нафар деҳқонни ҳибсга олди, дейди қишлоқ раҳбари
Ҳибсга олишлар ҳақида АҚШ бошчилигидаги Халқаро мониторинг ва амалга ошириш механизмига хабар берилган, бироқ Исроил ҳарбийлари бунга изоҳ бермаган.
Ливан жанубида уч нафар ливанлик деҳқон Исроил кучлари томонидан қўлга олинди, деб маълум қилди қишлоқ раҳбари.
Исса Абеделаалнинг Би-би-сига маълум қилишича, Исроил кучлари уч нафар деҳқонга қўл телефонлари орқали қўнғироқ қилиб, маълум бир жойга келишни буюрган, улар ўша ерда ҳибсга олиниб, олиб кетилган.
Ушбу ҳодиса Исроил кучларининг Ҳасбая вилоятидаги Ҳалта қишлоғига кириши ортидан юз берди. Бу ҳудуд Исроил ҳанузгача босиб турган тахминан 600 квадрат километрлик майдон ичида жойлашган.
Қўлга олиш ҳолатлари ҳақида Исроил ва Ливан ўртасидаги хавфсизликни мувофиқлаштириш учун масъул бўлган, АҚШ бошчилигидаги Халқаро мониторинг ва амалга ошириш механизмига хабар берилган. Исроил ҳарбийлари изоҳ бериш сўровига жавоб бермади.
Бир неча соат ўтгач, Исроил мамлакатда ушлаб турилган яна бир Ливан фуқаросини озод қилди. Бу апрель ойида АҚШ воситачилигида Исроил ва Ливан ўртасида музокаралар бошланганидан бери тинч аҳоли вакилининг озод этилиши билан боғлиқ маълум бўлган биринчи ҳолат деб ишонилмоқда.
Малек Ғозий Халқаро Қизил Хоч Қўмитаси томонидан Ливан армиясига топширилди, Исроил эса жума куни яна тўрт нафар ливанлик тинч аҳоли вакили озод қилиниши кераклигини айтмоқда.
Икки давлат ўртасидаги музокаралар Ҳизбуллоҳни қуролсизлантириш, Исроил қўшинларини олиб чиқиб кетиш ва Ливан армиясини жанубда жойлаштиришни назарда тутувчи тизим устида боши берк кўчага кириб қолгани сабабли, 30 дан ортиқ ливанлик ҳанузгача Исроил ҳибсхоналарида қолмоқда деб тахмин қилинмоқда.
Ғозий Нақура назорат-ўтказиш пунктида топширилди ва тиббий кўрикдан ўтиш учун Тир шаҳридаги армия разведка муассасасига олиб борилди.
Унинг оиласига кўра, у ўтган йилнинг октябрь ойида спорт билан шуғулланиш учун уйдан чиқиб кетганидан кейин ғойиб бўлган.
Исроил бош вазири идораси жума куни озод қилиниши режалаштирилган бошқа тўрт нафар тинч аҳоли вакили сўроқ қилингани ва уларнинг қуролли гуруҳларга алоқаси йўқлиги аниқланганини билдирди.
Ливан Бош вазири Наваф Салам Ғозийнинг озод этилишини олқишлади ва бунга ёрдам бергани учун АҚШга миннатдорчилик билдирди.
Унинг айтишича, ҳукумат барча ливанлик маҳбусларни озод қилиш, бедарак йўқолганлар ҳақида маълумот олиш ва Исроил қўшинларини Ливан ҳудудидан тўлиқ олиб чиқиб кетиш устида ишлашни давом эттиради.
Маҳбуслар масаласи АҚШ воситачилигидаги кенг қамровли музокараларнинг бир қисми бўлиб, бундан ташқари, мамлакатдаги фуқаролар уруши пайтида ўғирлаб кетилган ва ўлдирилган Ливан яҳудий жамоаси етакчиларининг жасадлари қолдиқларини қайтариш бўйича алоҳида ҳаракатлар ҳам олиб борилмоқда.
Музокаралар, шунингдек, июнь ойи ўрталарида келишилган тизимни ҳам ўз ичига олади. Унга кўра, Ҳизбуллоҳ қуролсизланиши, Ливан армияси жанубда жойлашиши ва Исроил кучлари белгиланган "пилот ҳудудлар"дан бошлаб босқичма-босқич чиқиб кетиши кутилмоқда.
Бироқ, Исроил Ливан армиясининг ролини шубҳа остига қўйгани ва келишувга риоя қилиниши қандай текширилиши борасидаги келишмовчиликлар туфайли жараён жуда суст илгарилади.
Ҳизбуллоҳ музокараларни ва пилот ҳудудлар концепциясини бутунлай рад этади.
Икки томон ҳалигача музокараларнинг саккизинчи раунди санасини белгиламаган.
Исроил Ливан жанубига ҳужумларни давом эттирмоқда ва расмийларнинг айтишича, Исроил ҳарбийлари ўз позицияларини кенгайтирмоқда.
Ливан расмийларига кўра, август ойида Исроилнинг ушбу минтақага уюштирган ҳаво ҳужуми оқибатида 11 киши ҳалок бўлган. Исроил Мудофаа Кучлари (IDF) ўша пайтда Исроил аскарларига қилинган ҳужумдан сўнг, ушбу зарба билан Ҳизбуллоҳ командирини йўқ қилганини маълум қилган эди.