Ипотека ва даволаниш учун. Ўзбекистонда пенсия жамғармаларидан муддатидан олдин фойдаланишга рухсат берилиши мумкин
Ипотека ва даволаниш учун. Ўзбекистонда пенсия жамғармаларидан муддатидан олдин фойдаланишга рухсат берилиши мумкин
Ўзбекистон аҳолиси келажакда пенсияга чиқишдан олдин ҳам ўз пенсия жамғармаларини тасарруф этиш ҳуқуқига эга бўлиши мумкин. Ушбу маблағларни ипотека бўйича бошланғич бадал сифатида ва оғир касалликларни даволашга йўналтиришга рухсат бериш таклиф этилмоқда.
Бундай ислоҳот билан Иқтисодиёт ва молия вазирлиги чиқди. Лойиҳага кўра, 2030 йил 1 январдан бошлаб пенсия жамғармаларини фуқароларнинг тўлақонли шахсий мулки сифатида — муддатидан олдин фойдаланиш ва мерос қилиб қолдириш ҳуқуқи билан мустаҳкамлаб қўйиш режалаштирилмоқда.
Бошқача айтганда, шахсий пенсия ҳисобварағида тўпланган маблағларни пенсия ёшини кутмасдан, ипотекага уй-жой сотиб олишга йўналтириш мумкин бўлади. Маблағларни муддатидан олдин олиш учун яна бир асос оғир касалликларни даволаш бўлади.
Бунда мерос ҳуқуқи жамғармаларнинг тўлиқ суммасига, жумладан, давлат қўшимча тўловлари ва инвестиция даромадларига татбиқ этилади. Агар ҳисобварақ эгаси вафот этса, маблағлар тўлиқ ҳажмда унинг қонуний меросхўрларига ўтади.
Бундан ташқари, фуқароларга ўз пенсия жамғармаларини молиявий воситалар орқали мустақил равишда инвестиция қилиш имкониятини бериш кўзда тутилмоқда. Олинган фойда пенсия ҳисобварағига қайтарилади.
Ўзгаришлар жамғармаларни бошқариш тизимига ҳам дахл қилади. 2027 йилдан бошлаб ушбу функцияларни Халқ банкидан бюджетдан ташқари Пенсия жамғармасига ўтказиш режалаштирилмоқда.
Ҳозирда ислоҳот лойиҳаси жамоатчилик муҳокамасига қўйилган бўлиб, у 30 сентябргача давом этади.
Шунингдек, ушбу ислоҳот доирасида пенсия ёшини босқичма-босқич ошириш таклиф этилмоқда: эркаклар учун — 60 ёшдан 63 ёшгача, аёллар учун — 55 ёшдан 58 ёшгача.