Ҳюндаи ҳашаматли ГВ90 электрокроссоверини тақдим этди

Ҳюндаи компанияси ҳашаматли ГВ90 электрокроссоверини намойиш этди.

20-август куни Ҳюндаи Мотор ўзининг Генесис бренди остида янги, тўлиқ ўлчамли электр кроссовери – ГВ90 моделини тақдим этди.

Ушбу модел фақат электр юритмага мўлжалланган платформада яратилган бўлиб, ички ёнув двигателини ўрнатиш имконияти мавжуд эмас. Автомобилнинг узунлиги 5,28 метрни, ғилдираклар базаси эса 3,24 метрни ташкил этади. Ҳаракат равонлигини ошириш мақсадида осма тизим пневматик элементлар билан жиҳозланган, орқа ўқнинг базавий талқини эса бошқарилувчи ғилдираклар ва юқори ишқаланишли дифференсиал билан таъминланган. Иккита электр мотор жами 657 от кучи ва 800 Нм айлантирувчи лаҳзани тақдим этади, узатма эса тўлиқ. Сиғими 123,5 кВт·соат бўлган тортиш аккумулятори бир қувватланишда 500 км масофа босиш имконини беради.

ГВ90 нинг стандарт талқини етти ўринли, уч қаторли салонга эга. Модел қаторининг энг юқорисидан Неолун номли супер-люкс модификацияси ўрин олган. Бу – марказий устунларсиз, орқа эшиклари Роллс-Ройсе автомобилларидек ҳаракатга тескари очиладиган тўрт ўринли талқиндир.

Неолун салонида орқа ўриндиқлар вентиляция, массаж, иситиш ва электр созлаш тизимлари, шунингдек, йиғилувчан болдир таянчи билан жиҳозланган. Марказий устунларнинг йўқлиги остоналар ва эшик ўйиқларидаги юқори мустаҳкам пўлатдан ясалган кучайтирилган штампланган элементлар ҳамда қўшимча яширин каркас билан қопланган. Орқа эшиклар икки босқичда ишлайди: аввал ўйиқдан чиқади, сўнгра очилади. Илгаклар конструксияси орқа ва олд эшикларни бир-биридан мустақил равишда бошқариш имконини беради.

Тўрт ўринли талқиндаги олдинги ўриндиқлар автомобил тўхтаб турганида 180 даражага бурилиб, орқа йўловчиларга юзланган ҳолда меҳмонхона услубидаги салонни ҳосил қилиши мумкин.

Энг юқори комплектация, шунингдек, 25 та динамикли Банг & Олуфсен премиум аудиотизими, 25 дюймли проексион дисплей ва 24,6 дюймли сирпаниб чиқувчи медиаекранни ўз ичига олади.