Ҳисоб палатаси боғчалар харажатларини онлайн-назорат қилишни жорий этди
Ўзбекистонда мактабгача таълим ташкилотларини молиялаштиришни режалаштириш ва уларнинг харажатларини онлайн режимда мониторинг қилиш учун Masofaviy audit тизими тақдим этилди.
Ўзбекистон Ҳисоб палатаси мактабгача таълим ташкилотларини молиялаштиришни режалаштириш ва уларнинг харажатларини онлайн назорат қилиш бўйича ахборот тизимини ишга туширди.
Янги функционал «Masofaviy audit» тизимида жорий этилди. Унинг ёрдамида ҳар бир мактабгача таълим ташкилотининг бюджет маблағларига бўлган эҳтиёжини аниқлаш, уни ажратилган молиялаштириш ҳажми билан солиштириш ва амалдаги харажатларни таҳлил қилиш мумкин.
Тизимнинг ишлаши учун Иқтисодиёт ва молия вазирлиги, Мактабгача ва мактаб таълими вазирлиги, шунингдек, коммунал хизматлар кўрсатувчи ташкилотларнинг ахборот ресурслари интеграция қилинди. Идоралар ва ташкилотлар ўртасида маълумот алмашинуви йўлга қўпилди.
Тизим мактабгача таълим ташкилотларининг молиявий эҳтиёжлари, уларга ажратилган маблағлар ва амалга оширилган харажатлар тўғрисидаги маълумотларни қайта ишлайди. Ушбу кўрсаткичларни солиштириш молиялаштириш танқислиги ва харажатларнинг асоссиз ортиб кетиши хавфини ўз вақтида аниқлашга ёрдам бериши керак.
Ушбу воситани қўллаш, шунингдек, алоҳида мактабгача таълим ташкилотларининг эҳтиёжларини ҳисобга олган ҳолда бюджет ресурсларини режалаштириш ва тақсимлаш аниқлигини ошириш имконини беради.
Тизим тақдимоти Ҳисоб палатасида бўлиб ўтди.
Тадбирда Президент Администрацияси раҳбарининг таълимни ислоҳ қилиш масалалари бўйича ўринбосари Обид Ҳакимов, Бош вазирнинг биринчи ўринбосари — таълим ва фан вазири Эркинжон Турдимов, шунингдек, Ҳисоб палатаси раҳбарияти иштирок этди.
Иштирокчилар мактабгача таълимни молиялаштириш ва бюджет харажатлари самарадорлигини оширишда тизим имкониятларидан фойдаланишни муҳокама қилдилар.
Вазирликлар вакилларига янги функционални амалиётда синаб кўриш имконияти берилди. Синов якунлари бўйича тизимни янада такомиллаштириш бўйича «йўл харитаси»ни тайёрлаш режалаштирилмоқда.