Ҳиндистонда ёлғиз кексалар учун пулли суҳбат хизмати пайдо бўлди
Мумбайда ёлғиз яшовчи кексалар 26–42 доллар эвазига бирга чой ичадиган, суҳбатлашадиган ёки сайрга чиқадиган ҳамроҳ ёллаши мумкин.
Ҳиндистонда ёлғиз кексалар учун пулли суҳбат хизмати йўлга қўйилди
Ҳиндистонда кексаларга суҳбатдош ва ҳамроҳ топиб берадиган пулли хизмат иш бошлади.
БМТ прогнозларига кўра, 2020–2050-йиллар оралиғида дунё бўйича 60 ёшдан ошганлар сони икки баравар ошиб, 2,1 миллиардга етади. Ҳиндистонда эса аҳолининг 21 фоизини, яъни ҳар беш кишидан бирини кексалар ташкил этиши кутилмоқда.
Ҳиндистонда катта оилалар сони қисқариб, ёшлар ота-оналаридан узоқда яшай бошлагани сабабли кўплаб кексалар ёлғиз қолмоқда. Уларга ижтимоий ёрдам кўрсатиш имкониятлари эса чекланган. Шу боис мамлакатда кексаларнинг ёлғизлигини камайтиришга қаратилган янги хизматлар яратилмоқда.
Масалан, Мумбайда ёлғиз яшовчи кекса киши 2500–4000 рупий (26–42 доллар) эвазига ўзига ҳамроҳ ёллаши мумкин. У билан бирга чой ичадиган, ҳикояларини тинглайдиган, сайрга ёки кинога борадиган суҳбатдош топиб берилади.
Бироқ мутахассисларнинг айтишича, бундай бизнесдан даромад олиш осон эмас. Чунки оилалар одатда кекса қариндошларининг руҳий ҳолатидан кўра, тиббий хизматларига кўпроқ пул ажратади. Шунга қарамай, Ҳиндистонда кексалар учун шунга ўхшаш бошқа хизматлар ҳам йўлга қўйилмоқда.
Шаҳар ҳукумати кекса ёшдаги аҳолини қўллаб-қувватлаш чораларини кучайтирмоқда. Жумладан, асосий пенсия миқдорини ошириш кўзда тутилган.