Ҳиндистонда тушлигига кир ювиш кукуни қўшиб берилган ўқувчилар касалхонага тушиб қолди
Ҳиндистонда тушликка кир ювиш кукуни қўшиб берилган ўқувчилар шифохонага ётқизилди.
Ҳиндистоннинг Биҳар штатидаги давлат мактабида 30 дан ортиқ ўқувчи заҳарланишдан азият чекди. Ҳукуматнинг бепул овқатлантириш дастури доирасида берилган тушликда туз етишмаслигидан шикоят қилган болаларга адашиб кир ювиш кукуни берилгани маълум қилинди. Бу ҳақда Тҳе Индепендент хабар берди.
Наланда туманидаги Парса ўрта мактабининг камида 34 нафар ўқувчиси 18-август куни ошқозонида куйиш ҳисси борлигидан шикоят қилгач, зудлик билан касалхонага олиб борилди. Ўқувчиларнинг сўзларига кўра, тушликка пиширилган гуруч, картошка ва сояли сабзавотли карри берилган.
"Кўпчилик ўқувчилар овқатни егандан кейин ҳушини йўқотди", деди ўқувчилардан бири журналистларга.
Тушликдан кўп ўтмай, бир қанча ўқувчиларнинг боши айлана бошлаган ва қайт қилган. Мактаб маъмурияти уларга биринчи тиббий ёрдам кўрсатган. Болаларнинг аҳволи яхшиланмагач, улар яқин атрофдаги касалхонага олиб кетилган.
Мактаб директори Шаилендра Кумар Сингҳнинг таъкидлашича, ошхона ходимлари ўқувчилар қўшимча туз сўраганда адашиб уларга кир ювиш кукунини бериб юборган.
"Ошхонадаги учта ошпаздан бири болаларга овқат тарқатаётган эди. Бир нечта бола туз сўраганида, ходим адашиб туз ўрнига кир ювиш кукунини узатган. Тушлик овқати эса нодавлат ташкилот томонидан етказиб берилади", деди мактаб директори.
Хирург Жай Пракаш Сингҳ ўқувчилар касалхонага овқатдан заҳарланиш аломатлари билан олиб келинганини айтди.
"Барча болаларнинг саломатлиги барқарор. Ҳаммаси яхши бўлиб кетади", дея қўшимча қилди у.
Биҳар штати вазири Шраван Кумар касалхонада ўқувчилар ҳолидан хабар олгач, бундай хатога қандай йўл қўйилганини аниқлаш учун атрофлича текширув ўтказилишини билдирди. Бу Ҳиндистон ҳукуматининг мактабларда бепул овқат бериш дастурида юз берган навбатдаги нохуш ҳолатдир.
Дастур дунёдаги энг йирик бепул мактаб таомлари лойиҳаларидан бири ҳисобланади. У болаларнинг овқатланиш даражасини яхшилаш, мактабга қатнашни ошириш ва ўқишни ташлаб кетишни камайтириш учун давлат мактабларида бепул тушлик беради. Лойиҳа доирасида бутун мамлакат бўйлаб бир миллиондан ортиқ мактабда 120 миллион бола пиширилган овқат билан таъминланади.
Шунга қарамай, бузилган овқатлар билан боғлиқ ҳолатлар учраб турибди. Январ ойида Телангана штатида 20 дан ортиқ ўқувчи сифациз тушлик сабаб касал бўлиб қолган эди. 2025-йилда 100 дан ортиқ бола ўлик илон тушиб қолган овқатни еганидан сўнг бетоб бўлган.