Ҳамма нарсага жавобгар
Қозоғистонда Каспийдаги ҳарбийлар ўлимидан сўнг Ҳарбий-денгиз кучлари бош штаби бошлиғи ва яна тўрт нафар командир қўлга олинди
Ҳамма нарсага жавобгар
Каспийдаги машғулотлар вақтида ҳарбий хизматчилар ҳалок бўлиши иши бўйича Мудофаа вазирлиги тизимининг беш нафар мансабдор шахси қўлга олинди, деб хабар берди Қозоғистон ИИВ.
«Хизматга совуққонлик билан қараш ва кема бошқариш қоидаларини бузиш билан боғлиқ, оғир оқибатларга олиб келган жиноий ҳуқуқбузарликларни содир этганликда гумонланиб, Қозоғистон Қуролли Кучлари олий ва катта қўмондонлик таркибининг масъул мансабдор шахслари қўлга олинди. Уларнинг барчаси Ақтау полиция бошқармасининг вақтинчалик сақлаш ҳибсхонасига жойлаштирилди», – дейилади хабарда.
Улар орасида:
— штаб бошлиғи – ҚР Ҳарбий-денгиз кучлари бош қўмондонининг биринчи ўринбосари;
— икки нафар ҳарбий қисм командири;
— денгиз пиёдалари ротаси ва катер командирлари бор.
Тергов давомида ўқув-жанговар вазифани ташкил этиш ва ўтказишда қарорлар қабул қилиниши ҳолатлари, хавфсизлик талабларига риоя этилиши, гидрометеорологик вазиятнинг ҳисобга олиниши, катернинг техник ҳолати ва машғулотларни ўтказишга масъул бўлган мансабдор шахсларнинг ҳаракатлари текширилмоқда. Идорадан таъкидланишича, судгача бўлган тергов жараёни Ички ишлар вазирлиги ва Бош прокуратуранинг алоҳида назоратида турибди.
Мазкур факт бўйича иккита жиноят иши қўзғатилган: 453-модда, 2-қисм («Оғир оқибатларга олиб келган хизматга совуққонлик билан қараш») ва 465-модда («Кема бошқариш қоидаларини бузиш») бўйича. Гумонланувчилар аниқланган.
ҚР Бош прокуратураси хабар беришича, тергов аллақачон воқеа жойини кўздан кечирган, 30 дан ортиқ ҳарбий хизматчини сўроқ қилган, ҳужжатлар ва видеоматериалларни олиб қўйган, 12 та экспертиза тайинлаган ва гумонланувчиларни аниқлаган.
Сўнгги маълумотларга кўра, машғулотлар давомида 14 киши ҳалок бўлган, уч киши қутқарилган. Қутқарувчилар, ғаввослар ва авиация Каспий денгизи акваториясида бедарак йўқолган ҳарбий хизматчиларни туну кун қидирди. 25 сентябрь куни эрталаб бедарак йўқолган охирги икки ҳарбий хизматчининг жасади топилди, шундан сўнг қидирув операцияси якунланди.
25 сентябрь Қозоғистонда умуммиллий мотам куни деб эълон қилинди.
2026 йил 24 сентябрда Каспийда юз берган ва 14 нафар ҳарбий хизматчининг ҳаётига зомин бўлган фожиа машғулотлар ва жанговар тайёргарлик вақтида шахсий таркиб хавфсизлиги масаласини яна кун тартибига чиқарди. Мустақиллик йилларида Қозоғистон Қуролли Кучлар тизимида йирик фавқулодда вазиятлар – авиаҳалокатлар, ўқ-дорилар омборларидаги портлашлар, машғулотларда ҳарбийларнинг ҳалок бўлишига бир неча бор дуч келган.
2004 йил 14 сентябрь – Як-18 ҳалокати, Ақтўбе вилояти – 2 ҳалок бўлган
Мартук туманидаги Хлебодаровка ҳарбий-ўқув полигонида ўқув-машқ парвози вақтида Як-18 самолёти бошқариб бўлмайдиган шпиралга (штопор) кириб, қулаб тушган. Т. Я. Бегелдинов номидаги Ҳаво мудофааси кучлари ҳарбий институтининг учувчи-йўриқчиси ва курсанти ҳалок бўлган.
2007 йил 16 февраль – Қарағанда яқинида МиГ-31 ҳалокати – 2 ҳалок бўлган
Ўқув парвози вақтида Сари-Арқа аэропортидан тахминан беш километр узоқликда Ҳаво мудофааси кучларининг МиГ-31 қирувчи-тутиб олувчи самолёти қулаб тушган. Экипажнинг иккала аъзоси – капитан Денис Федотов ва майор Андрей Леонтьев ҳалок бўлган.
2008 йил 12 февраль – МиГ-29УБ ҳалокати, Жетиген – 1 ҳалок бўлган
Алмати вилоятидаги Жетиген аэродромида ўқув-жанговар МиГ-29УБ қулаб тушган. Иккала учувчи ҳам катапульта қилган, бироқ майор Александр Ковязин ҳалок бўлган, подполковник Виталий Дилмуҳамедов жароҳат олган. Кейинчалик комиссия ҳалокатни самолётнинг электр таъминоти тизимидаги носозлик билан боғлаган.
2009 йил 20 март – Арисда ўқ-дориларни утилизация қилиш пайтидаги портлашлар – 4 ҳалок бўлган
Ўқ-дориларни утилизация қилиш билан шуғулланувчи «КазАрсенал» ҳудудида ёнғин бошланиб, кейин детонация ва бир нечта портлашлар содир бўлган. Натижада тўрт киши ҳалок бўлган, яна 17 киши жароҳатланган. Кейинчалик тергов хавфсизлик талабларининг қўпол равишда бузилганини аниқлаган. Ушбу ФВ ҳарбий ўқ-дориларни утилизация қилиш тизимига тегишли, бироқ ҳалок бўлганлар корхона ишчилари бўлган, шу боқисдан уларнинг тўрталасини ҳам ҳарбий хизматчи деб ҳисоблаб бўлмайди.
2012 йил 22 август – Остона яқинида Ми-17 ҳалокати – 4 нафар ҳарбий хизматчи ҳалок бўлган
Остона аэродроми ҳудудида ўқув-машқ парвози вақтида Мудофаа вазирлигининг Ми-17 вертолёти қулаб тушган. Тўрт кишидан иборат бутун экипаж ҳалок бўлган.
2013 йил 27 август – Отарда ўқ-дориларни утилизация қилиш пайтидаги портлаш – 4 ҳалок бўлган
Жамбил вилоятининг Отар станцияси яқинидаги «Казахвзрывпром» АЖ ўқ-дориларни утилизация қилиш пунктида порох зарядлари ёниб кетган ва кейинчалик портлаш содир бўлган. Етти киши оғир термик куйиш жароҳатини олган, тўрт киши кейинчалик вафот этган. Ўша даврдаги манбаларда «Казахвзрывпром» Мудофаа вазирлигининг шўъба тузилмаси сифатида кўрсатилган; ҳалок бўлганлар ҳарбий хизматчилар эмас, балки корхона ишчилари бўлган. Кейинчалик ушбу иш бўйича корхона ходимлари судланган.
2014 йил 23 сентябрь – Талдиқўрған яқинида Су-27 ҳалокати – 2 нафар ҳарбий хизматчи ҳалок бўлган
Ўқув-машқ парвози вақтида Су-27 билан алоқа йўқолган. Самолёт Алмати вилоятининг Кўксу туманида қулаб тушган. Подполковник Ерлан Науанов ва подполковник Денис Горбунов ҳалок бўлган.
2015 йил 18 сентябрь – Ақтауда «Марказ-2015» машғулотлари вақтида Каспийдаги фожиа – 4 нафар ҳарбий хизматчи ҳалок бўлган
Денгиз десантини тушириш эпизодини машқ қилиш вақтида Каспийга 52 нафар ҳарбий хизматчи бўлган олтита БТР-80 чиққан. Кучли тўлқин туфайли тўртта бронетранспортёр чўкиб кетган. Тўрт нафар муддатли ҳарбий хизматчи ҳалок бўлган.
2017 йил 17 февраль – Жамбил вилояти, Кўқсой дарасида қор кўчкиси – 7 нафар ҳарбий хизматчи ҳалок бўлган
Жуали туманидаги 91678 ҳарбий қисм ҳарбий хизматчиларининг режали жанговар тайёргарлик машғулотлари вақтида қор кўчкиси юз берган. Унинг остида тоғ-ўқчи полкининг 23 нафар ҳарбий хизматчиси қолган. Етти киши ҳалок бўлган, қолганлари қутқарилган. Бу ҳозирги фожиагача бевосита жанговар тайёргарлик вақтида юз берган энг йирик фавқулодда вазиятлардан биридир.
2019 йил 27 март – Қизилўрда вилоятида Ми-8 ҳалокати – 13 нафар ҳарбий хизматчи ҳалок бўлган
Мудофаа вазирлигининг Ми-8 ҳарбий вертолёти вертолётлар гуруҳи таркибида парвоз қилаётганда ҳалокатга учраган. Бортда 13 киши бўлган – барчаси ҳалок бўлган. Ҳалок бўлганлар сони бўйича бу мустақил Қозоғистон Қуролли Кучларидаги энг йирик ҳалокатлардан биридир.
2019 йил 24 июнь – Арисдаги арсеналда портлашлар – 4 ҳалок бўлган, юзлаб жароҳатланганлар
44856 ҳарбий қисмнинг ўқ-дори омборларида ёнғин бошланиб, ўқ-дориларнинг оммавий детонацияси содир бўлган. Деярли бутун шаҳар аҳолисини эвакуация қилишга тўғри келган.
2021 йил 26 август – Жамбил вилояти Бойзақ туманидаги ўқ-дори омборида ёнғин ва портлашлар – 17 ҳалок бўлган, улардан 6 нафари Мудофаа вазирлиги ҳарбий хизматчилари
28349 ҳарбий қисмда муҳандислик ўқ-дорилари омборида ёнғин чиққан, шундан сўнг бир қатор кучли портлашлар содир бўлган. Ҳалок бўлганларнинг умумий сони бўйича бу мустақиллик йилларида Мудофаа вазирлиги объектида юз берган энг йирик фавқулодда вазиятлардан биридир.