Ҳам юк ташийди, ҳам дронларга ўқ узади: АҚШда ҳайдовчисиз машина тақдим этилди
АҚШнинг Фортерра ва Ҳйперсрафт компаниялари хавфли ҳудудларга ҳарбий юкларни ҳайдовчисиз етказишга мўлжалланган машинани тақдим этди. Разорбаск платформаси 1800 килограммгача юк ташийди ва кичик дронларга қарши қуролли турел билан жиҳозланган.
Ҳам юк ташийди, ҳам дронларга қарши ўқ узади: АҚШда ҳайдовчисиз автомобил намойиш этилди
Лойиҳа Ҳйперсрафт компаниясининг йўлтанламас Разорбаск машинаси, Фортерра ишлаб чиққан АутоДриве автоном бошқарув тизими ва 9 Мотҳерс компаниясининг Эдда турелини бирлаштиради.
Машина таъминот йўллари ўққа тутилаётган вазиятларда юк етказиб бериш учун мўлжалланган. Бундай вазифаларни ҳайдовчисиз бажариш одамларнинг бевосита хавф остида қолишини камайтиришга қаратилган.
Разорбаск — Юта штатининг Прово шаҳридаги Ҳйперсрафт компанияси яратган биринчи тўлиқ машина. Компания аввал тижорат транспорти учун электр куч қурилмаларини ишлаб чиқиш билан шуғулланган, кейинчалик эса мудофаа йўналишидаги ишланмаларни ҳам бошлаган.
Машинанинг узунлиги тўрт метрдан ошади, юк кўтариш қуввати эса 1,8 тоннага тенг. Ҳйперсрафт маълумотига кўра, унинг юриш захираси қарийб 800 километрни ташкил этади. Бундан ташқари, машина ташқи ускуналарни 38 киловаттгача электр қуввати билан таъминлай олади.
Конструксия вазифага қараб қўшимча датчиклар, радиостансиялар, қуроллар ва бошқа жиҳозларни ўрнатиш имконини беради. Разорбаск бошидан автоном ишлашга мўлжаллангани АутоДриве бошқарув тизимини ўрнатишни енгиллаштирган.
Машинага ўрнатилган Эдда турелининг оғирлиги тахминан 23 килограмм. У кичик дронларни парраклари овозидан аниқлайди, камералар орқали кузатади ва сочма ўқли милтиқдан ўқ узади. Тизим 10 метрдан 100 метргача масофадаги дронларни нишонга олиш учун мўлжалланган.
Шу тариқа, янги платформа ҳарбий таъминотни автоном етказиб бериш ва дронларга қарши курашиш имкониятларини битта машинада жамлади.