Германияда қишда газ тақчиллиги юзага келиши мумкин
Германияда ерости омборларидаги газ захиралари сентабр бошида 53 фоизгача тушиб, статистика юритила бошланганидан буён энг паст кўрсаткични қайд этди. Операторлар қиш жуда совуқ келса, захиралар феврал бошидаёқ тугаб қолиши мумкинлигидан огоҳлантирмоқда.
Германияда қиш мавсумида газ танқислиги юзага келиши эҳтимоли бор
Германиядаги ерости газ ва водород омборлари операторларини бирлаштирувчи ИНЕС (Инитиативе Энергиен Спеичерн) мамлакатда яқинлашаётган қишда табиий газ таъминоти билан боғлиқ муаммолар пайдо бўлиши мумкинлигини билдирди.
Ташкилот 8-сентабр куни эълон қилган маълумотларга кўра, сентабр бошида Германиядаги газ омборлари атиги 53 фоизга тўлдирилган. Бу тегишли статистика юритила бошланганидан бери, яъни сўнгги 15 йил ичидаги энг паст кўрсаткич ҳисобланади.
Таққослаш учун, ўтган йили омборлардаги газ захиралари 53 фоизлик даражага июн охиридаёқ етган, сентабр бошида эса тўлиш даражаси қарийб 71 фоиз бўлган.
ИНЕС ҳисоб-китобларига кўра, техник жиҳатдан Германия 1-ноябрга қадар газ омборларини тахминан 77 фоизгача тўлдириши мумкин. Бироқ бунинг учун газни омборларга қуйиш суръатини анча ошириш зарур.
Хусусан, қолган икки ой ичида омборларга сўнгги уч ой давомида жами қуйилганидан ҳам кўпроқ газ жойлаштириш керак бўлади.
Мутахассислар баҳосига кўра, агар қиш одатий ҳароратда ўца, омборларнинг 77 фоизга тўлдирилиши мамлакат эҳтиёжларини қоплаш учун етарли бўлиши мумкин.
Аммо қиш 2010-йилдагидек жуда совуқ келадиган бўлса, бундай захира етмайди. ИНЕС моделлаштиришига кўра, экстремал совуқ ссенарийсида газ омборлари январ ойидаёқ кескин камайиб, феврал бошига бориб бутунлай бўшаб қолиши мумкин.
ИНЕС раҳбари Себастиан Хайнерман ҳам омборларнинг 77 фоизга тўлдирилиши ўта паст ҳарорат шароитида етарли эмаслигини айтган. Шу билан бирга, илиқ ёки одатий совуқ қишда бу миқдордаги захира етарли бўлиши кутилмоқда.
ИНЕС Германиядаги табиий газ ва водород омборлари операторларини бирлаштиради. Ташкилот маълумотига кўра, унинг 17 та аъзоси мамлакатдаги газ сақлаш қувватларининг 90 фоиздан ортиқ қисмини қамраб олади.
Германия газ омборларининг аввалги йилларга нисбатан паст даражада тўлдирилаётгани бир неча ойдан бери муҳокама қилинмоқда. ИНЕС бу ҳолатни, аввало, бозордаги иқтисодий шароит билан изоҳламоқда.