Германияда бензин бир соатда арзонлашди
Германияда ёнилғига солиқ имтиёзлари қайта жорий этилиши ортидан бензиннинг ўртача нархи бир соат ичида 10–11 сентга пасайди. Мамлакат бўйича ўртача нарх литрига 2 евродан тушган, бироқ барча ҳудудларда ҳам бундай арзонлашиш кузатилмаган.
Германияда бензин бир соат ичида арзонлашди
ДВ нашри дпа агентлигига таяниб хабар беришича, Германияда «ёнилғи чегирмаси» — Танкрабатт 1-октабрга ўтар кечаси кучга кирган.
Танккöниг порталининг маълумотларига кўра, 30-сентабр соат 23:41 дан 1-октабр соат 00:41 гача бензиннинг мамлакат бўйича ўртача нархи литрига 10–11 сентга пасайган. 1-октабр эрталаб ҳам аввалги ҳафталардаги нархларга нисбатан деярли шу фарқ сақланиб қолган.
Германия автомобил клуби — АДАС маълумотига кўра, кўплаб ёнилғи қуйиш шохобчаларида энг арзон бензин тури — Супер-Э10 нархи литрига 2 евродан пастлаган.
Шу билан бирга, ҳудудлар орасида тафовут бор. Мюнхен, Штутгарт ва Лейпсигда бундай нарх жуда кўп шохобчаларда кузатилган, Берлинда эса кўплаб шохобчаларда қайд этилган. Гамбургда бензинни 2 евродан арзон нархда фақат айрим шохобчалардан топиш мумкин бўлган.
Кёлнда эса 1-октабр эрталаб ҳолатига бензин нархи 2 евродан тушган бирорта шохобча қайд этилмаган. Шунга қарамай, Танккöниг кузатувларида мамлакат бўйича ўртача нарх 2 евродан анча паст бўлган.
Литрига 16,7 сентлик солиқ енгиллиги 1-октабр соат 00:00 дан бошлаб омборлар ва нефтни қайта ишлаш заводларидан чиқарилган бензин ҳамда дизел ёнилғисига қўлланилади.
Бироқ бу чакана нархлар айнан 16,7 сентга тушиши кафолатланганини англатмайди. Ёнилғи қуйиш шохобчалари нархни бевосита шунчага камайтиришга мажбур эмас.
«Бу чегирма истеъмолчиларга тўлиқ ҳажмда етиб борадими-йўқми, яқин кунларда маълум бўлади», - дея қайд этган дпа.
Ҳукумат ушбу чорани бензин ва дизел нархларининг кескин ошишига жавобан қабул қилган. Агентликка кўра, сентабр ёнилғи нархлари бўйича бошқа ойлардан анча қиммат бўлган ва бу умумий инфляция даражасига ҳам таъсир қилган.
Ҳукумат чораси танқидчилари чегирманинг амалдаги аниқ ҳажмини ҳисоблаш қийинлигини айтмоқда. Уларнинг фикрича, бундай енгилликлар автомобил эгаларининг ёнилғини тежашга қизиқишини камайтиради, солиқ пасайишидан келадиган фойда эса истеъмолчиларга тўлиқ етиб бормайди.