Германия ҳаво кучлари илк Ф-35 самолётини қабул қилиб олди
Германия ҳаво кучлари ўзининг илк Ф-35 самолётини қабул қилиб олди
18-сентябр куни Германия мудофаа вазири Борис Писториус АҚШнинг Техас штатида Германия ҳаво кучлари учун мўлжалланган биринчи Ф-35А қирувчи самолётини қабул қилди.
Топшириш маросими самолётни ишлаб чиқарувчи Лоскҳеед Мартин компаниясининг Форт Уертдаги штаб-квартирасида бўлиб ўтди.
Лоскҳеед Мартин бу топширувни Германия ва НАТО учун муҳим босқич деб баҳолади. Писториус эса Ф-35А самолётларининг етказиб берилиши Германия ҳаво кучлари учун “янги давр” бошланганини англатишини таъкидлади.
“Янги Ф-35А қирувчиси дунёдаги энг замонавий жанговар самолётдир”, деди у.
Унинг айтишича, самолёт кам кўринувчанлик технологияси ва кучли сенсор тизими билан ажралиб туради. Ф-35А катта ҳажмдаги маълумотларни йиғиб, уларни қисқа вақт ичида ягона оператив манзарага бирлаштира олади.
Германия мудофаа вазири дастлабки қирувчилар 2026-йилда етказиб берилишини, Ф-35А самолётларининг тўлиқ оператив тайёргарлигига эса 2029-йилгача эришиш режалаштирилганини маълум қилди.
Писториус, шунингдек, Германия яна 19 давлат билан бирга умумий стандартлар, технологиялар ва тартиб-таомиллардан фойдаланиб, трансатлантик мудофаа ҳамкорлигини амалда мустаҳкамлаб бораётганини айтди.
**Дастлабки саккизта Ф-35 АҚШда қолади**
Германия ҳаво кучлари учун мўлжалланган дастлабки саккизта Ф-35 самолёти ҳозирча АҚШда қолади. Улар Германия учувчилари ва техникларини тайёрлаш учун ишлатилади.
2027-йилдан бошлаб дастлабки самолётларни Германиянинг Рейнланд-Пфалц федерал еридаги Бюхел авиабазасига жойлаштириш режалаштирилган. Ф-35А қирувчилари у ерда Германия ҳаво кучларининг Торнадо самолётлари ўрнини эгаллайди.
Писториус АҚШга ташрифи чоғида, 15-сентябр куни АҚШ мудофаа вазири Пит Ҳегсет билан мудофаа соҳасидаги ҳамкорликни кенгайтиришга қаратилган қурол-яроғ бўйича келишувни ҳам имзолаган.
Аввалроқ Саудия Арабистони АҚШдан Ф-35 қирувчи самолётлари сотиб олган эди. Саудия Арабистони 2025-йил бошида АҚШ президенти Доналд Трампга самолётларни харид қилиш бўйича тўғридан тўғри мурожаат қилган. Қироллик узоқ вақтдан бери Лоскҳеед Мартин компаниясининг қирувчи самолётларига қизиқиш билдириб келмоқда. Давлат департаментига кўра, қирувчи самолётларни сотиш учун Конгресснинг рухсати ҳам талаб этилади.