Фрида Калодан “Юлдузлар жанги”гача: Лос Анжелесда Жорж Лукаснинг миллиард долларлик музейи қуриб битказилди
Фрида Калодан “Юлдузлар жанги”гача: Лос-Анжелесда Жорж Лукаснинг миллиард долларлик музейи қуриб битказилди
Лос-Анжелесда “Юлдузлар жанги” филми муаллифи Жорж Лукас ва унинг рафиқаси Меллоди Ҳобсон томонидан асос солинган Лукас ҳикоя санъати музейи (Лусас Мусеум оф Нарративе Арт) қурилиши якунланди. Лойиҳани ишлаб чиқиш ва қуришга 10 йилдан ортиқ вақт сарфланди, унинг қиймати эса тахминан бир миллиард долларни ташкил этди. Музей қурилишида 150 дан ортиқ меъмор, муҳандис ва дизайнер иштирок этди.
Бинони МАД Арчитесц бюроси лойиҳалаштирган. Дастлаб музейни Чикагода қуриш режалаштирилган эди — биринчи вариант 2014-йилдаёқ тақдим этилган, бироқ кейинчалик лойиҳа тўлиқ қайта ишланиб, Лос-Анжелесга кўчирилган. Уни 2021-йилда очиш мўлжалланган эди.
Музей қарийб 5,3 гектарлик жамоат боғининг марказий обьектига айланди. Унинг зилзилага чидамли бетон ва пўлат каркаси шиша толали полимер билан мустаҳкамланган 1200 та панел билан қопланган — уларнинг ҳар бири ўзига хос шакл ва жойлашувга эга. МАД Арчитесц вакилларининг сўзларига кўра, бундай элементларни зарур аниқликда тайёрлаш имконини берувчи технологиялар сўнгги йиллардагина пайдо бўлди. Ишлаб чиқариш жараёнида роботлардан ҳам, қўл меҳнатидан ҳам фойдаланилган.
Бинонинг асосий қобиғида бирорта ҳам тўғри чизиқ йўқ. Катта эгри корпус ердан бироз кўтарилган бўлиб, бу унинг остида ёпиқ майдон яратиш имконини берган. Марказий пўлат арка 56 метрга чўзилган, тўртинчи қават баландлигида эса ташриф буюрувчилар осмонни томоша қилиши мумкин бўлган эллипс шаклидаги тирқиш мавжуд.
Беш қаватли бинодан визуал ҳикоячиликнинг қадимги даврлардан то ҳозирги кунгача бўлган тарихига бағишланган 30 дан ортиқ галерея ўрин олган. Коллексиялардан бирида Фрида Калонинг автопортрети, қадимги Миср сопол буюмлари ва “Юлдузлар жанги”га оид материаллар, жумладан, Люк Скаюокер ва Дарт Вейдер ўртасидаги жанг саҳнаси ёнма-ён намойиш этилган. Шунингдек, бино ичида иккита замонавий кинотеатр, тақа шаклидаги кутубхона, ўқув хоналари, дўкон ва кафе мавжуд.
Лойиҳада экологик ечимлар ҳам кўзда тутилган. Мажмуанинг шимоли-ғарбида чуқурлиги 111 метрдан бўлган 714 та геотермал қудуқдан иборат совутиш тизимига уланган катта фаввора жойлашган. Томга қуёш панеллари ўрнатилган ва яшил майдон ташкил этилган, музей атрофида эса 300 туп янги дарахт экилган. Боғда шунингдек осма боғ, амфитеатр, майсазор ва жамоат жойлари ҳам бор. Мазкур музей 22-сентябр куни ташриф буюрувчилар учун расман очилади.