Францияда талабалар норозилик намойишлари кучайиши ортидан 400 дан ортиқ киши қўлга олинди
Ўқувчилар ўтган ҳафтадан бери юқори синф мактабларидаги шароитлар ва ресурсларга қарши норозилик билдирмоқдалар.
Францияда сешанба куни бутун мамлакат бўйлаб лицей ўқувчиларининг кучайиб бораётган норозилик намойишлари фонида 400 дан ортиқ киши, уларнинг аксарияти вояга етмаганлар қўлга олинди, деб маълум қилди Франция ички ишлар вазири.
Парижда бошланган ва ўсмирлар бир неча кундан бери ўз мактабларини тўсиб қўйиши билан давом этаётган намойишларга синфхоналарнинг ҳаддан ташқари тирбандлиги ва ўқитувчилар етишмовчилиги каби муаммолардан хавотирлар сабаб бўлган.
Расмийларнинг билдиришича, сешанба кунги норозилик намойишлари чоғида камида 10 нафар ўқитувчи ва бир неча ўқувчи, шунингдек, 48 нафар ҳуқуқ-тартибот идораси ходими жароҳатланган. Таълим вазирлиги камида 400 та мактаб зарар кўрганини маълум қилди.
Фотосуратлар ва видеоларда намойишчилар томонидан чиқинди қутиларига ўт қўйилгани ва автобус бекатларига шикаст етказилгани акс этган.
«Биз бу ерга ўз фикримизни етказиш учун келганмиз», деди 16 ёшли ўқувчи қиз AFP ахборот агентлигига. «Биз бу ерга ҳамма нарсани беҳуда вайрон қилиш учун келганимиз йўқ. Биз айнан таълим тизими бутунлай издан чиққанини айтиш учун келдик. Ҳар бир синфда 34 кишимиз ва бу шунчаки имконсиз. Ўқитувчилар ҳаддан ташқари кўп ишламоқда».
Франция таълим вазири Эдуар Жеффре X ижтимоий тармоғида қолдирган постида ўқувчилар норозилик билдириш ҳуқуқига эга эканини айтди, бироқ зўравонлик ҳақидаги хабарларни «оқлаб бўлмайдиган» деб таърифлади.
Ички ишлар вазири Лоран Нуньес BFMTV телеканалига 440 киши қўлга олинганини маълум қилди ва қўшимча қилди: «Бизда ҳали якуний рақамлар йўқ, лекин менга айтишларича, уларнинг учдан икки қисми полиция ҳибсхонасига олиб борилган».
Франция ОАВларининг хабар беришича, намойишчилар полициячиларга қарата турли буюмларни улоқтирган, полиция эса бунга жавобан калтаклар ва кўзни ёшлатувчи газдан фойдаланган.
Ўқувчилар манфаатларини ҳимоя қилувчи «Union Syndicale Lycéenne» президенти Риад Рани AFP агентлигига Франция ҳукумати «қатағон» олиб бораётганини айтди ва полицияни ҳаддан ташқари куч ишлатишда айблади.
Бир неча француз сиёсатчилари томонидан танқид қилинган полициянинг намойишларга бўлган муносабати ҳақидаги саволга Нуньес бу «ўта мутаносиб тарзда амалга оширилганини» айтди.
Сешанба куни кечқурун таълим вазири Жеффре ижтимоий тармоқдаги постида шундай деди: «Намойиш қилиш ҳуқуқи асосий эркинлик бўлиб, у бундай ҳаракатлар учун баҳона бўла олмайди.
Уларни қонунийлаштириш ёки ушбу шароитда тўсиқларни кенгайтиришга чақириш ўқувчиларимиз ва давлат хизматчиларини хавф остига қўйишдир. Бу масъулиятсизликдир».
Буюк Британиядаги коллежлар ёки АҚШдаги юқори синфларга тенг келадиган Франция лицейларидаги ҳаракат ўтган ҳафтада Париж атрофидаги Иль-де-Франс минтақасида бошланган эди.
Душанба куни Франция Бош вазири Себастьян Лекорню 164 киши ҳибсга олинганидан кейин ўқувчилар норозилик намойишларининг ҳар қандай кучайиши «масъулиятсизлик» бўлишидан огоҳлантирди.
X тармоғидаги постида Лекорню намойишларда қайд этилган ҳодисаларга тўхталиб, шундай деди: «Лицейлар яқинидаги пиротехника воситалари, ёнғинлар, зўравонликлар: ҳеч нарса ўқувчилар, ходимлар ёки полиция ходимларини хавф остига қўйишни оқлай олмайди».
Сешанба кунги ўқувчилар намойишлари ўқитувчилар, шифохона ходимлари ва давлат хизматчилари манфаатларини ифодоловчи касаба уюшмаларининг кам иш ҳақи ва меҳнат шароитларига норозилик сифатида бутун мамлакат бўйлаб ўтказган иш ташлашлари билан бир вақтда бўлиб ўтди.
Нуньеснинг сўзларига кўра, камида 200 000 киши иштирок этгани айтилган ушбу норозилик намойишлари асосан тинч ўтган.