Франция бош вазири 164 киши ҳибсга олинганидан кейин мактаблардаги норозилик намойишлари кучайишидан огоҳлантирди

Франция Бош вазири 164 киши ҳибсга олинганидан кейин мактаблардаги норозилик намойишлари кучайишидан огоҳлантирди

Франция Бош вазири Себастьян Лекорню душанба куни 164 киши ҳибсга олинганидан кейин мамлакатда давом этаётган талабалар норозилик намойишларининг янада кучайиши «масъулиятсизлик» бўлишидан огоҳлантирди.

Парижда бошланган ва ўсмирлар бир неча кундан бери ўз мактабларини тўсиб қўйиши билан давом этаётган намойишларга синфларда ўқувчилар сони ҳаддан ташқари кўплиги ва ўқитувчилар етишмовчилиги каби хавотирлар сабаб бўлмоқда.

X ижтимоий тармоғидаги постида Лекорню намойишларда қайд этилган ҳодисаларга ишора қилиб, шундай деди: «Лицейлар яқинидаги пиротехника воситалари, ёнғинлар, зўравонликлар: ҳеч нарса ўқувчилар, ходимлар ёки полиция ходимлари ҳаётини хавф остига қўйишни оқлай олмайди».

Бироқ, лицей ўқувчилари манфаатларини ҳимоя қилувчи Франция касаба уюшмаси норозилик намойишлари улар дуч келаётган шароитларга «қонуний жавоб» эканини айтди.

Ички ишлар вазири Лоран Нуньес душанба куни хавфсизлик кучларининг 12 нафар аъзоси, 12 нафар ўқувчи ва уч нафар мактаб ходими жароҳатлангани, 180 та мактаб зарар кўрганини маълум қилди.

У ҳибсга олинганлар ҳақида бошқа тафсилотларни очиқламади.

Буюк Британиядаги коллеж ёки АҚШдаги юқори синфларга тенг бўлган Франция лицейларидаги ҳаракат ўтган ҳафта Парижни ўраб турган Ил-де-Франс минтақасида бошланган эди.

Вандализм ҳолатлари қайд этилди, полицияга қарата пиротехника воситалари отилди ва шундан бери норозиликлар Франциянинг бошқа ҳудудларига ҳам тарқалди.

AFP ахборот агентлиги хабарига кўра, жанубий Альп-Маритим ва Вар минтақаларида тўртта лицей тўсиб қўйилган. Норозилик намойишлари Марсель, шимолий Лилль ҳудуди ва шимоли-шарқий Арденнадаги Седанда ҳам қайд этилган.

Ўқувчилар манфаатларини ифодаловчи «Union Syndicale Lycéenne» касаба уюшмаси ижтимоий тармоқдаги постида норозиликларни ҳимоя қилди.

«Ўқитувчилар ва ходимлар етишмовчилиги, хароб бўлган мактаблар, ҳаддан ташқари тиғиз жадваллар ва гавжум синфлар, Parcoursup [Францияда талабалар олий таълимнинг биринчи йилига ҳужжат топширишлари учун фойдаланиладиган веб-платформа] туфайли юзага келган стресс... Бу муаммолар асло муқаррар эмас, балки шунчаки Макрон сиёсатининг 10 йили ва миллий таълим тизимида ресурслар етишмаслиги натижасидир», дейилади унда.

Уюшма ўқувчиларни сешанба куни «ўз ҳуқуқларини ҳимоя қилиш ва бюджетни қисқартиришга қарши» мактабларни тўсиб қўйишга чақирди.

Шу куни ўқитувчилар, шифохона ходимлари ва давлат хизматчилари манфаатларини ифодаловчи касаба уюшмалари ҳам паст иш ҳақи ва меҳнат шароитлари каби муаммоларга норозилик сифатида бир кунлик иш ташлашга чақирди.

Талабалар ҳаракатига жавобан Лекорню «лицейларнинг муаммолари эшитилиши ва ҳал қилиниши керак», аммо «зўравонлик сўзсиз қораланиши ва уни содир этганлар ўз қилмишлари учун жавоб бериши керак» деди.

Бош вазир, шунингдек, ўта чапчи «Бўйсунмас Франция» (LFI) партиясини ўқувчиларни ҳаракатни кенгайтиришга ундашда айблади.

LFI етакчиси Жан-Люк Меланшон Лекорню ҳукуматини норозилик намойишини «бостиришга буйруқ берганликда» айблади ва унда иштирок этаётган лицей ўқувчилари «безарар» эканини қўшимча қилди.

Аммо Нуньес намойишлар ва тўсиқлар «унчалик одатий норозилик ҳаракатлари эмаслигини» айтди.

«Бу кўпроқ шаҳардаги зўравонликларга ўхшайди, унда ниқоб таққан, найчалардаги пиротехника воситалари ва улоқтирувчи снарядлар билан жиҳозланган бир қатор шахслар ички хавфсизлик кучлари билан тўқнашишни очиқдан-очиқ хоҳлашган», деди у.

«Бу талаблар қўйиш ҳақида эмас эди; бу ҳақиқатан ҳам соф кўринишдаги зўравонлик эди».

Норозилик намойишлари бошланганидан бери ўқувчилар ва полиция ходимлари ўртасида зўравонлик билан боғлиқ бир нечта ҳодисалар қайд этилган.

Франциянинг BFMTV телеканали хабарига кўра, ҳодисалардан бирида полиция ходими оломонни назорат қилиш учун ишлатиладиган гранатамётдан ўқ узган ва оқибатда бир лицей ўқувчиси жароҳатланган.

Телеканал ушбу ҳодисалар юзасидан тергов ҳаракатлари бошланганини қўшимча қилди.