Франция қишлоғида ўғлининг ўқитувчисини ўлдириш билан таҳдид қилган эркак қамоққа олинди
Ота Тулуза яқинидаги бошланғич мактабнинг аёл ўқитувчисини бошини кесиш билан таҳдид қилган эди.
Франция қишлоғида ўғлининг ўқитувчисини ўлдириш билан таҳдид қилган эркак қамоққа олинди
Францияда бошланғич мактабда ўғлига танбеҳ берган аёл ўқитувчини ўлдириш билан таҳдид қилган эркак олти ойлик қамоқ жазосига ҳукм қилинди.
У пайшанба куни, Тулуза жануби-ғарбий шаҳри яқинидаги тахминан 2600 аҳолиси бўлган Ле-Фога қишлоғида содир бўлган воқеадан олти кун ўтиб, тезлаштирилган суд мажлисида айбдор деб топилди.
Ўқитувчи расмий ҳимоя остига олинган ва касаллик таътилига чиққан.
Франция таълим вазири Эдуар Жеффре шундай деди: "Ҳеч бир ўқитувчи ўз вазифасини бажаришдан қўрқмаслиги керак. Улардан бирига ҳужум қилиш — бутун тизимга ҳужум қилиш демакдир".
Ёз фаслида Жеффре ўқувчининг оила аъзолари томонидан ходимларнинг хавфсизлиги ёки соғлиғига таҳдид солувчи "жиддий хавф"дан уларни ҳимоя қилишга қаратилган қонунни қабул қилинишига эришган эди.
Вазирнинг сўзларига кўра, ушбу ҳолат мазкур фармон кучга кирадиган дастлабки ҳолатлардан бири бўлади.
Бу воқеа Францияда бундан олти йил аввал Париж чеккасидаги Конфлан-Сент-Онорин шаҳрида ўқитувчининг боши кесиб кетилгани билан боғлиқ оғриқли хотираларни ёдга солади. Самуэль Пати ўз мактаби яқинида 18 ёшли чечен қочқини томонидан ўлдирилган эди.
Ле-Фогада ўқитувчининг ҳамкасблари ўтган жума куни содир бўлган воқеа сабабли душанба куни ишга чиқишмади.
Тулуза таълим бошқармаси бошлиғи Карим Бенмилуднинг сўзларига кўра, таҳдид эркак мактабга суҳбат учун чақирилганидан кейин янграган.
Ле-Фога мэри Жан-Мари Пюиг BFMTV телеканалига берган интервьюсида эркакнинг ўғли дарсда тартибни бузганини ва ўқитувчи уни тинчланиши учун бошқа синфга юборганини, бироқ у у ерда ҳам ўзини ёмон тутишда давом этганини айтди.
BFMTV хабарига кўра, ўша синфдаги ўқитувчи болага "ўзингни безоридек тутишни бас қил" деган.
Шундан сўнг унга отаси томонидан таҳдид қилинган. Мэрнинг сўзларига кўра, ота уни "мактаб ташқарисида кутиб турган ва агар у эркак киши бўлганида, бошини кесиб ташлаши билан таҳдид қилган".
Кейинчалик ота узр сўраган, бироқ судга шикоят аризаси киритилган ва у пайшанба куни тушдан кейин Тулуза прокурори ҳузурида ҳозир бўлган.
Июль ойида қабул қилинган фармон таълим органлари аралашган ва ходимлар учун жиддий хавф мавжуд бўлган ҳолатларда ўқувчини бошқа мактабга ўтказишга рухсат беради.
Эндиликда бола ва унинг синглиси Ле-Фогадан ташқаридаги бошқа мактабга ўтказилиши мумкинлиги тахмин қилинмоқда.