Франция: норозилик намойишлари сабабли 400 дан ортиқ лицей масофавий таълимга ўтказилди
Францияда лицей ўқувчиларининг норозилик намойишлари давом этмоқда, бу 400 дан ортиқ таълим муассасасини қамраб олди. 1 октябрь куни бир қатор шаҳарларда норозилик акциялари ва лицейларни тўсиб қўйиш ҳолатлари юз берди; айрим ҳолларда полиция билан тўқнашувлар содир бўлди, деб хабар беради Le Monde.
Франция: норозилик намойишлари фонида 400 дан ортиқ лицей масофавий таълимга ўтказилди
Таълим вазири Эдуард Жеффре зўравонликда «ўта сўл гуруҳ»ни айблаб, ҳаракатнинг «табиати ўзгарганини» маълум қилди.
Нашрнинг хабар беришича, лицейчилар ва талабалар касаба уюшмалари ўқитувчилар сонини кўпайтиришни ҳамда биноларни таъмирлаш бўйича фавқулодда режа тайёрлашни талаб қилишган.
Жума куни, 2 октябрда, 400 дан ортиқ лицей ёпилган, уларда дарслар масофавий форматда ўтилмоқда.
Мамлакат Ички ишлар вазирлиги маълумотларига кўра, пайшанба куни 1 949 киши қўлга олинган; Адлия вазирлигининг хабар беришича, душанба кунидан бери 1 793 киши ҳибсга олинган.
Таълим вазири ҳаракат бошланганидан буён 65 нафар ходим ва 170 нафар ўқувчи жабрланганини маълум қилди.
Стипендия олмайдиган талабалар учун BTS ва тайёрлов синфларида ўқиш учун тўлов чораси бекор қилинди (тегишлича 178 ва 270 евро).
Жума куни таълим вазири лицейчилар ва ўқувчиларнинг ота-оналари ассоциацияларини қабул қилади.
Касаба уюшмалари ўқитувчиларни оммавий равишда ишга қабул қилиш ва биноларни таъмирлаш бўйича фавқулодда режа ишлаб чиқилишини талаб қилмоқда.
Миллий лицейчилар иттифоқи президенти Ряд Рани ва Миллий талабалар иттифоқи вакили Сабрин Харбаш жума куни уларни таълим вазири қабул қилишини маълум қилишди. Касаба уюшмалари вакилларининг талаблари қаторида — ўқитувчиларни оммавий равишда ишга қабул қилиш, биноларни таъмирлаш режасини ишлаб чиқиш ва уларнинг таъкидлашича, университетлар ҳамда мактабларни етарлича молиялаштирмаслик муаммосини ҳал қилиш бор.
Эдуард Жеффре лицейчилар ҳаракати «бошида қонуний бўлганини», аммо ҳозирда «ўта зўравон гуруҳлар томонидан эгаллаб олинганини» айтди.
У шунингдек, «Бўйсунмас Франция» (La France insoumise, LFI) партиясини тўсиқларни «авж олдириш ва ўзлаштириб олиш»да айблади.